У беларускім TikTok з'явіўся блогер-правакатар

Ён выводзіць людзей на эмоцыі, а потым патрабуе праз суд кампенсацый за абразы.

Ціктокер, які выпускае «гумарыстычныя культурна-забаўляльныя праграмы, звязаныя з фальклорам», прадаўжае караць крыўдзіцеляў. Дзве жанчыны, якія абразілі блогера падчас стрыму ў TikTok, патрапілі на грошы двойчы – яны атрымалі штраф, а таксама павінны выплаціць яму кампенсацыю маральнай шкоды. Чарговую цяжбу разгледзеў суд Мазырскага суда – і мяркуючы з фармулёвак, суддзя непрыхільна ставіцца да такога заробку ціктокера, паведамляе «Люстэрка».

14 лістапада летась блогер вёў прамы эфір, які глядзелі 140 чалавек. У нейкі момант узнікла сварка з дзвюма глядачкамі, якія пачалі яго абражаць у «непрыстойнай форме».

Ціктокер нажаліўся на падпісчыцаў у міліцыю. У выніку кожную з іх аштрафавалі на падставе ч. 2 арт. 10.2 (абраза) КаАП Беларусі на 10 базавых велічыняў (400 рублёў). Але на гэтым мужчына не спыніўся і падаў пазоў у суд на кампенсацыю маральнай шкоды.

«Пасля гэтай трансляцыі ён доўга не змог выходзіць у эфіры, паколькі ўсё прыняў блізка да сэрца, бо адказнікі зняважылі ягоны гонар і годнасць перад падпісчыкамі, сябрамі і ягонымі гледачамі. Таксама ён страціў прыбытак, бо некаторы час адчуваў страх выходзіць у эфіры. Адказчыкі прычынілі яму маральную шкоду і маральныя пакуты, прынізіўшы яго гонар і годнасць, таксама прычынілі яму душэўны боль, у выніку чаго яму даводзілася прымаць заспакойлівыя сродкі і звяртацца па псіхалагічную дапамогу», – так у матэрыялах суда апісваецца пазоў блогера да жанчынаў, якія абразілі яго.

Ён запатрабаваў 2500 рублёў ад кожнай з жанчынаў у якасці кампенсацыі маральнай шкоды і пакрыцця судовых выдаткаў.

У судзе жанчыны не адмаўлялі таго, што абражалі ціктокера, але яны адзначылі, што абразы былі ўзаемнымі. Аднак суддзя не знайшоў гэтаму дакладных доказаў, хоць і дапусціў, што нецэнзурная лаянка глядачак магла быць рэакцыяй на рэплікі блогера, які таксама ў сваіх відэа актыўна выкарыстоўвае інвектыўную лексіку (гэта значыць абразы, якія прынята ўважаць за вербальную агрэсію. Прыклады такой лексікі: «дзермакраты» замест дэмакратаў, «сакратутка» – у дачыненні да сакратаркі, «дзеўка» – жанчына і гэтак далей – Заўв.).

«Звяртае на сябе ўвагу той факт, што пазоўнік, нягледзячы на тое, што выказаныя адказчыцамі нецэнзурныя словы насілі негатыўны статус, не спыніў трансляцыю і прадоўжыў іх слухаць, што сведчыць пра яго зацікаўленасць у зыходзе слоўнай сваркі. А ягоныя звароты ў суды з пазовамі аб спагнанні кампенсацыі маральнай шкоды з прычыны абразаў у сацыяльнай сетцы ТikTok носяць масавы характар», – адзначыў суддзя.

На працэсе таксама высветлілася, што нягледзячы на заявы блогера, што абразы жанчынаў прывялі да таго, што ён перастаў выходзіць у эфір, ён прадаўжаў весці стрымы. Факт ягонага звароту да лекара па псіхалагічную дапамогу мужчына пацвердзіць не змог.

Пры вынясенні пастановы суд таксама ўзяў да ўвагі наяўнасць чацвярых дзяцей у адной з жанчынаў і стан здароўя іншай. У выніку суддзя пастанавіў, што адна з глядачак павінна выплаціць 50 рублёў кампенсацыі маральнай шкоды і 120 рублёў судовых выдаткаў, а другая – 80 рублёў кампенсацыі і 120 рублёў судовых выдаткаў.

Нагадаем, у верасні летась суд у Баранавічах разглядаў пазоў гэтага ж ціктокера да мясцовай жыхаркі. Акалічнасці былі такімі самымі: жанчына абразіла яго ў прамым эфіры, пасля чаго ён зведаў пакуты і не мог выходзіць у эфір. Ён нажаліўся на яе ў міліцыю, пасля чаго жанчыну аштрафавалі на 370 рублёў, а потым запатрабаваў ад яе праз суд кампенсацыю маральнай шкоды памерам 2500 рублёў. Сама жанчына прызналася, што абмацярыла мужчыну, але раней яна шмат разоў чула, што ён выдае сябе за лекара-псіхатэрапеўта, выводзіць людзей на эмоцыі і потым піша на іх заявы ў міліцыю.

Тады суддзя таксама палічыў патрабаванні блогера завышанымі і палічыў, што кампенсацыі памерам 200 рублёў яму будзе даволі.

Хто ж гэты блогер? Знайсці старонку шоўмэна ў нам, на жаль, не атрымалася. З матэрыялаў суда вядома, што ён жыхар Баранавіцкага раёна і займаецца фермерствам: вырабляе прадукты для сябе і на продаж, у яго восем кароваў, 15 козаў і два трактары. Але фермерства – не адзіны ягоны занятак: мужчына яшчэ і відэаблогер са сваім каналам у TikTok, дзе, паводле ягоных словаў, вядзе трансляцыі, «гумарыстычныя культурна-забаўляльныя праграмы, звязаныя з фальклорам».