У кавярні ў цэнтры Гомеля гатавалі стравы з пратэрмінаваных прадуктаў

І ў антысанітарных умовах.

Дзяржкантроль часова закрыў гомельскую кавярню, у якой падчас праверкі былі знойдзены пратэрмінаваныя прадукты і антысанітарыя.

У прэс-службе КДК распавялі, што ўстанова знаходзіцца ў цэнтры горада, але яе назву не раскрылі.

«На кухні кавярні выяўлена больш за 14 кілаграмаў недабраякаснай прадукцыі, у тым ліку тры кілаграмы пратэрмінаванага сыра, сасісак і іншых прадуктаў. На шэраг кулінарных вырабаў і паўфабрыкатаў, спецыі, соусы адсутнічалі дакументы аб іх якасці і бяспецы. Не было дакументаў і аб паступленні гэтай прадукцыі ў кавярню», - распавялі ў камітэце.

Акрамя таго, на некаторых таварах і ўпакоўках не было маркіроўкі з інфармацыяй, дзе і калі былі зроблены прадукты, які ў іх тэрмін прыдатнасці.

Апроч пратэрміноўкі і няякасных інгрэдыентаў, кантралёры выявілі яшчэ і антысанітарыю на кухні.

«На адным стале нарэзаліся салаты і апрацоўвалася сырое мяса. Тут жа захоўвалася сыравіна і асабістыя рэчы работнікаў», - растлумачылі ў Дзяржкантролі.

Пакуль уладальнікі кавярня не ліквідуюць парушэнні, яна будзе зачыненая. Усе няякасныя прадукты канфіскавалі, а ў дачыненні да парушальніка пачалі адміністрацыйныя працэсы.