У Бразіліі жанчына прывезла ў банк цела дзядзькі, каб узяць на яго крэдыт

Чым усё скончылася.

Бразільянка Эрыка дэ Соўза Віейра Нуньес паспрабавала ўзяць крэдыт на імя свайго мёртвага дзядзькі, цела якога яна прывезла ў банк у Рыа-дэ-Жанэйра, піша мясцовая газета Diario de Noticias.

Інцыдэнт адбыўся ў банку, размешчаным у раёне Банга ў заходняй частцы Рыа-дэ-Жанэйра. Жанчына зайшла ў будынак з целам свайго 68-гадовага дзядзькі Паўла Раберта Брага, якое знаходзілася ў інвалідным вазку. Эрыка хацела ўзяць крэдыт у суме блізу €3 тысяч.

Калі яна падышла, каб аформіць дакументы, то прыкінулася, што яе дзядзька жывы. На відэа, якія з'явіліся ў сацсетках, паказана, як яна размаўляе з Паўла, але той ёй не адказвае. «Дзядзька, ты чуеш? Ты павінен падпісаць. <...> Падпісвайся, каб больш не прычыняць мне галаўнога болю, я больш не магу гэтага трываць», - прыводзіць газета словы Эрыкі. На кадрах таксама бачна, што ў нейкі момант жанчына нават узяла руку дзядзькі, каб паставіць подпіс.

У выніку паводзіны жанчыны прыцягнулі ўвагу супрацоўнікаў банка і яны выклікалі паліцыю. Эрыку затрымалі і арыштавалі за спробу крадзяжу, махлярства, а таксама за здзек з трупа.