Камітэт выведкі ЗША заклікаў неадкладна дапамагчы Украіне на гэтым тыдні

Пасля сакрэтнага брыфінгу.

Камітэт выведкі Палаты прадстаўнікоў ЗША пасля сакрэтнага брыфінгу аб Украіне заклікаў Кангрэс тэрмінова ўхваліць дапамогу краіне да канца тыдня.

Адпаведную заяву камітэт апублікаваў у сераду, 17 красавіка, у X (Twitter).

Адзначаецца, што падчас нарады камітэт атрымаў інфармацыю аб крытычнай неабходнасці выдачы Украіне вайсковай дапамогі.

«Мы павінны перадаць дапамогу Украіне. Сёння на сакрэтным брыфінгу наш камітэт быў праінфармаваны наконт крытычнай неабходнасці выдачы Украіне вайсковай дапамогі на гэтым тыдні. Злучаныя Штаты павінны супрацьстаяць захопніцкай вайне (расейскага дыктатара Уладзіміра - рэд.) Пуціна цяпер, паколькі сітуацыя ва Украіне крытычная», - гаворыцца ў паведамленні.

Аўтарамі заявы з'яўляюцца старшыня камітэта кангрэсмэн-рэспубліканец Майк Тэрнер і высокапастаўлены чалец камітэта, кангрэсмен-дэмакрат Джым Гаймс.

Рэспубліканцы блакуюць законапраект аб дапамозе Украіне з кастрычніка 2023 года. Спачатку яны спасылаліся на неабходнасць узмацніць жорсткасць міграцыйнай палітыкі ЗША.