Навуковец: Штучны «звышінтэлект» можа з'явіцца значна раней, чым меркавалася

На ягоную думку, ШІ, аналагічны чалавечаму, з'явіцца цягам трох гадоў.

Чалавецтва можа стварыць штучны інтэлект, які не будзе саступаць чалавечаму, ужо цягам трох найбліжэйшых гадоў. Такую думку выказаў асноўны навуковец у гэтай галіне і генеральны дырэктар SingularityNET Бэн Герцэль, паведамляе Live Science.

Герцэль вядомы як «бацька AGI», паколькі ў пачатку 2000-х гадоў дапамог папулярызаваць гэты тэрмін, які расшыфроўваецца як «агульны штучны інтэлект».

Найлепшыя сістэмы ШІ, якія выкарыстоўваюцца сёння, уважаюцца за «вузкі штучны інтэлект», паколькі яны могуць быць больш здольнымі, чым людзі, толькі ў адной вобласці. Яны не могуць перасягнуць людзей у цэлым. Такія сістэмы, якія вар'іруюцца ад алгарытмаў машыннага навучання да такіх вялікіх моўных мадэляў (LLM), як ChatGPT, не могуць разважаць і разумець кантэкст.

Але Герцэль адзначыў, што даследаванні ў галіне ШІ саступаюць у перыяд экспанентнага росту, і звесткі сведчаць, што агульны штучны інтэлект (AGI), пры якім ШІ становіцца такім самым здольным, як і людзі, у некалькіх галінах, незалежна ад зыходных звестках навучання, знаходзіцца ў межах дасяжнасці. Гэты гіпатэтычны пункт развіцця ШІ вядомы як сінгулярнасць.

На меркаванне Герцэля, чалавецтва створыць першы варыянт AGI у 2029–2030 гадах. Але ён мяркуе, што гэта можа адбыцца і ў 2027 годзе.

Калі такі ШІ будзе спраектаваны такім чынам, каб мець доступ да ўласнага кода і перапісваць яго, ён можа хутка ператварыцца ў штучны звышінтэлект (ШЗІ). Яго Герцэль вызначае як ШІ, які валодае скамбінаванай кагнітыўнай і вылічальнай моцай усёй чалавечай цывілізацыі.

«Ніхто яшчэ не стварыў агульны штучны інтэлект чалавечага ўзроўню; ніхто не мае дакладнага ўяўлення, калі мы дабяромся да гэтага. Я маю на ўвазе, што ёсць вядомыя невядомыя і, верагодна, невядомыя невядомыя. З іншага боку, мне гэта здаецца цалкам верагодна, што мы зможам дасягнуць AGI чалавечага ўзроўню, скажам, у найбліжэйшыя тры-восем гадоў», – сказаў Герцэль.

Паводле ягоных словаў, існуюць «тры зыходныя лініі доказаў» у падтрымку ягонай тэзы. Першая з іх – мадэляванне Рэя Курцвейла, якое ён правёў у кнігах «Сінгулярнасць блізкая» (2005) і «Сінгулярнасць бліжэй» (2024). Ягоныя мадэлі паказалі, што AGI можа быць пабудаваны ўжо ў 2029 годзе.

Герцэль таксама звярнуў увагу на паляпшэнні, унесеныя ў праграмы LLM за некалькі гадоў, якія «адкрылі ў свеце патэнцыял ШІ». Ён растлумачыў, што LLM самі сабой не прывядуць да AGI, паколькі тое, як яны дэманструюць веды, не адлюстроўвае сапраўднага разумення, але LLM могуць быць адным з кампанентаў у шырокім наборы ўзаемазвязаных архітэктураў.

Трэцім доказам, паводле словаў Герцеля, з'яўляецца ягоная праца ў стварэнні інфраструктуры, якую ён назваў OpenCog Hyperon, а таксама звязаных з ёй праграмных сістэмаў і будучай мовы праграмавання AGI, якая атрымала назву MeTTa.

Гіпатэтычны канчатковы пункт мяркуе стварэнне інфраструктуры ШІ, якая будзе складацца з розных сістэмаў і прапаноўваць розныя элементы чалавечага спазнання, ад генерацыі кантэнту да разваг.

Разам з тым Герцэль прызнаў, што можа памыляцца, і што для стварэння AGI можа спатрэбіцца «квантавы кампутар з мільёнам кубітаў ці нешта такога кшталту».