«На вачах дырэктара блішчалі слёзы»

У Бярэзінскім раёне наладзілі паказальны разбор са школьнікамі.

У Бярэзінскім раёне наважылі паказальна разабрацца са школьнікамі, якія ўчынілі бойку і ўтрох збілі яшчэ аднаго вучня гэтай жа школы.

Як піша мясцовая дзяржаўная газета, "просты, на першы погляд, сюжэт стаў добрай падставай, каб глыбей разабрацца ў мікраклімаце дзіцячага асяроддзя і прычынах, якія штурхнулі хлопцаў на бойку".

Раённая камісія ў справах непаўналетніх выехала ў аграгарадок, дзе жывуць падлеткі, і там на месцы "скрупулёзна і ўсебакова падышла да разгляду правапарушэння". Разбор учынілі ў прысутнасці іншых вучняў і іх бацькоў, а дырэктар школы нават пусціла слязу. Як піша дзяржаўная газета, "ад сораму за сваіх выхаванцаў". У рэпартажы выданне непаўналетніх называе "парушальнікамі закону".

У аграгарадку Брадзец Бярэзінскага раёна адбыўся інцыдэнт - трое падлеткаў пабілі вучня той жа школы. На выязное паседжанне КСН у актавай зале школы паклікалі саміх вінаватых і пацярпелага, іх бацькоў. За тым, што адбывалася, назіралі іншыя школьнікі і іх сем'і.

Выявілася, неяк падлеткі паехалі ў суседні аграгарадок пагуляць і сустрэцца з сябрамі. Адзін з хлопцаў, старэйшых, прапанаваў правучыць школьніка, які нібыта «выдзяляецца ў школьным аўтобусе». У выніку здарылася бойка, у якой хлопцы пайшлі ўтрох на аднаго.

Як піша дзяржаўная газета, завадатара бойкі клічуць Ягор і ў яго даўно была антыпатыя да пацярпелага. Яшчэ двое ўдзельнікаў бойкі (імёны гэтых хлопцаў не пазначаны, але іх назвалі «ціхімі троечнікамі») раней у падобным заўважаны не былі.

«Вялікага і шчырага раскаяння ў зробленым за хлопцамі заўважана не было. Вядома, ім было няўтульна паўставаць перад сваімі сябрамі па школе, яны прылюдна прасілі прабачэння ў пацярпелага, але… Не вельмі былі абураныя тым, што здарылася, і бацькі дзяцей. Бліжэй за ўсіх прыняла да сэрца гэту сітуацыю дырэктарка школы Святлана Халімончык, на вачах якой блішчалі слёзы — ад сораму за сваіх выхаванцаў», — апісвае паказальнае паседжанне дзяржаўная газета.

Траіх школьнікаў, якія распачалі бойку, паставілі на прафілактычны улік. На працягу года іх будуць кантраляваць "усе суб'екты прафілактыкі дзіцячай безнагляднасці і злачыннасці". Удакладняецца, што за правіны ў будучыні іх могуць выклікаць на паўторную камісію, а далей - прыняць больш строгія меры ў дачыненні да іх і бацькоў. Правіннасцю можа стаць тая ж бойка ці дробнае хуліганства, а яшчэ любое дзеянне, якое палічаць парушэннем грамадскага жыцця, у тым ліку парушэнне парадку падчас урока ці знаходжання ў школе ці невыкананне абавязкаў па вучобе.