СМІ: Таджыкі пачалі масавы зыход з Расеі

Пасля тэракту ў «Крокус Сіці Хол».

Міністэрства працы, міграцыі і занятасці насельніцтва Таджыкістана зафіксавала адток працоўных мігрантаў з Расеі пасля тэракту ў падмаскоўным «Крокус сіці хол», сказала намесніца кіраўніка ведамства Шахноза Надзіры.

«Шмат званкоў вельмі. Гэта, хутчэй за ўсё, не столькі скаргі на прыгнёт, колькі боязь нашых грамадзян, паніка, шмат хто хоча з'ехаць. Мы зараз адсочваем сітуацыю, у нас прыязджае (у Таджыкістан) больш, чым з'яжджае», - цытуе яе ТАСС.

Дэфіцыт працоўных рэсурсаў у эканоміцы Расеі, які дасягнуў 5 млн чалавек, можа яшчэ больш узмацніцца праз адток працоўных мігрантаў, паведамляе The Moscow Times.

Дэфіцыт кадраў у будаўнічай галіне ў 2023 годзе вырас на 36% у параўнанні з 2022 годам, паведаміў у пятніцу прэзідэнт Нацыянальнага аб'яднання будаўнікоў Антон Глушкоў.

"Будаўнічы сектар уваходзіць у лік галін з самым высокім кадравым дэфіцытам", – цытуе Глушкова "Інтэрфакс".