Зяленскі назваў яшчэ адзін варыянт заканчэння вайны ва Украіне

Якая камбінацыя патрэбная абароне Украіны, каб яе вайскоўцы змаглі ісці наперад.

Ёсць розныя меркаванні наконт заканчэння вайны ва Украіне: нехта кажа, яна не скончыцца, пакуль ва ўладзе Пуцін, а нехта думае, што Украіна павінна стаць моцнай.

Пра гэта сказаў прэзідэнт Украіны Уладзімір Зяленскі ў інтэрв'ю амерыканскаму тэлеканалу CBS (пераклад - «Уніян»).

«Колькі будзе ісці гэтая вайна? Нехта кажа, што пакуль будзе жывы Пуцін. А нехта кажа, пакуль мы проста не будзем моцнымі», - адзначыў ён. З яго слоў, у свеце прапануюць розныя формулы міру і ўсім здаецца, што яны ведаюць, як скончыць вайну.

Зяленскі адзначыў, што так званы прэзідэнт Расеі Уладзімір Пуцін не хоча заканчваць вайну.

- Ён хоча быць да смерці ва ўладзе. Гэты чалавек, калі яго так можна назваць, ніколі сам з Крамля сваімі нагамі не выйдзе: ці яго выганяць адтуль, ці вынесуць, як гэта і было ў савецкі час - іх выносілі, - дадаў прэзідэнт Украіны.

З ягоных слоў, Пуцін прадае свайму грамадству ідэю вяртання нават не столькі СССР, а расейскай імперыі.

- Гэта значыць, для яго не выгадна заканчваць вайну, пакуль ён нас не акупуе. А акупаваць нас - гэта пазбавіць нас жыцця. Людзі абараняюцца і не жадаюць быць Расеяй. Мы хочам быць тымі, хто ёсць - свабоднымі, дэмакратычнымі, незалежнымі ўкраінцамі. Таму вайна, пакуль Украіна не будзе моцнай, а яна не настолькі цяпер моцная, як можа быць. Нам трэба даць магчымасць дзейнічаць на полі бою, а для гэтага патрэбныя дзве рэчы: сістэмы Patriot, якія могуць перадаць ЗША, і мы разблакуем неба, і нашы хлопцы будуць ісці наперад. А другое - патрэбен парытэт у артылерыі», - сказаў Зяленскі.

Ён падкрэсліў, што таксама патрэбныя ракеты. Пры гэтым дадаў, што калі Расея ведае, што можа ім на галаву прыляцець робат, то яна менш страляе, а калі яна будзе ведаць, што ва Украіны ёсць ракеты, якія могуць быць такімі ж дальнабойнымі як расейскія, то яны менш будуць страляць па людзях і энэргетыцы, бо «Пуцін будзе баяцца, што людзі яго вынесуць з Крамля».

Зяленскі падкрэсліў, што Украіне для таго, каб не страчваць тэрыторыі і трымаць фронт, патрэбныя сродкі супрацьпаветранай абароны і артылерыйскія набоі.

- Партнёры кажуць, што мы далі артылерыю. Так. Толькі колькасць набояў - гэта яшчэ не ўсё, - адзначыў ён.

Пры гэтым Зяленскі дадаў, што трэба разумець, аб якім тыпе набояў ідзе размова. «Вельмі складана ваяваць з ворагам, у якога артылерыйскі набой б'е 20 км плюс, а ў цябе ён б'е 20 км мінус», - падкрэсліў прэзідэнт Украіны. З яго слоў, Украіне для ўтрымання фронту трэба мець парытэт з ворагам, а каб наступаць, трэба мець большую сілу.