Сіноптыкі расказалі аб наступствах глабальнага пацяплення клімату для Беларусі

Змяненні будуць маштабнымі.

Са звестак гідраметэаралагічных назіранняў у Беларусі ў сярэднім за дзесяць гадоў цяплее на 0,4 градуса, прычым рост тэмпературы паветра адзначаецца ва ўсе сезоны года. Пра гэта паведаміла першы намесніца начальніка "Белгідрамета" Святлана Кузьміч падчас прэс-канферэнцыі.

Паводле ейных слоў, колькасць ападкаў, якія выпадаюць на тэрыторыі краіны, змянілася нязначна. Аднак з-за пацяплення павялічылася нераўнамернасць іх выпадзення, што ў спалучэнні з падвышаным тэмпературным рэжымам прыводзіць да ўзнікнення засушлівых з'яў.

«Апошняе дзесяцігоддзе (2014 -2023 гады) было з сярэдняй тэмпературай 8,1°C і было цяплейшым за ўсе папярэднія. А сярэдняя тэмпература паветра апошніх пяці гадоў (2019 -2023 гады) склала 8,3°C, што вышэй за кліматычную норму на 1,1 градуса», — распавяла Святлана Кузьміч.

Асабліва прыкметнай тэндэнцыя пацяплення зімой.

«За апошнія тры дзесяцігоддзі назіраецца дакладна выяўленая тэндэнцыя пацяплення, асабліва ў зімовы перыяд», - адзначыла яна.

Паводле звестак Белгідрамета, найбольш змянілася тэмпература паветра ў студзені, лютым і сакавіку. Калі параўнаць з сярэдняй шматгадовай тэмпературай у гэты перыяд, то апошнія гады яны сталі цяплейшымі на 2,4 — 2,6 градуса.

Менш за ўсё тэмпература паветра змянілася ў траўні і кастрычніку. Гэтыя месяцы апошнім часам сталі цяплейшымі на 0,4-0,6 градуса.

«Станоўчыя анамаліі тэмпературы паветра ў сакавіку і красавіку спрыяюць ранняму сходу снежнага покрыва і пераходу тэмпературы праз нуль градусаў на два-тры тыдні раней, чым звычайна", - расказала намесніца начальніка Белгідрамета.

Яна дадала, што ў Беларусі змяненне клімату прыводзіць не толькі да павелічэння колькасці засушлівых дзён, але і да з'яўлення на тэрыторыі краіны такіх экстрэмальных з'яў, як замаразкі, вельмі моцны вецер, шквалісты вецер і віхраслупы, вельмі моцны дождж, вельмі моцны снег, надзвычайная пажарная небяспека, якія наносяць шкоду эканоміцы краіны і здароўю насельніцтва.

Са слоў Кузьміч, ключавая роля ў барацьбе з наступствамі змены клімату належыць палітыцы дзяржавы. У Беларусі большасць мер для адаптацыі да змянення клімату ёсць у заканадаўстве, аднак асаблівае значэнне для зніжэння рызык мае павышэнне ўзроўню інфармаванасці насельніцтва.

Тым часам начальніца службы гідралогіі і аграметэаралогіі Белгідрамета Кацярына Істоміна расказала, што змяненні клімату паўплываюць на набор сельскагаспадарчых культур, якія будуць вырошчвацца на нашай тэрыторыі праз некалькі дзесяцігоддзяў.

Паводле ейных слоў, ёсць некалькі мадэляў або сюжэтаў развіцця змены клімату, але яны ўсё перасякаюцца ў адным: на нашай тэрыторыі пацяпленне.

«Ужо цяпер мы можам гаварыць, што ў нас мяняецца склад культур, таму што змяншаюцца плошчы льновалакна, умовы для бульбаводства таксама пагаршаюцца», - расказала яна.

Пры гэтым ёсць і пазітыўны эфект ад змянення клімату: у Беларусі пачала вырошчваць агародніну і садавіну, якую яшчэ 20 гадоў таму немагчыма было б уявіць на нашых палях. Гэта сланечнікі, вінаград, бахчавыя культуры.

Па словах Істомінай, Белгідрамет не бярэцца даваць прагнозы, добра гэта ці дрэнна, а толькі прагназуе, што змены будуць працягвацца, і яны будуць даволі маштабнымі.