«Шматлікія прадпрыемствы асуджаныя на банкруцтва»

Эксперты растлумачылі, чаму ў гандлі нарастаюць праблемы.

На фоне прадаўжэння ручнога рэгулявання коштаў гандлёвыя фірмы паведамляюць аб новых фінансавых праблемах. Тым часам інфляцыя пасля імклівага тармажэння ў канцы 2022-га і першай палове 2023 года зноў пачала ўбірацца ў сілу. На што паказваюць новыя цяжкасці ў галіне і ці можа працяг «шліфоўкі тлушчу» стукнуць па людзях, «Зеркалу» патлумачылі эксперты праекта «Вашы грошы».

Паводле інфармацыі Менскага сталічнага саюза прадпрымальнікаў і работадаўцаў, у гандлі даходы ўпалі на 15%. Што ў бізнэс-асацыяцыі звязваюць з прадаўжэннем рэгулявання коштаў, якое негатыўна адбіваецца на фінансах кампаній.

Тым часам месячная інфляцыя пасля запаволення ў першай палове мінулага года ўсё адно імкнецца ўгору. Тым не менш пакуль відавочных прыкмет наступстваў для насельніцтва ад стрымлівання коштаў не бачна, хоць эксперты не раз папярэджвалі, што яны могуць наступіць.

На думку экспертаў праекта «Вашы грошы», дзяржрэгуляванне цэн мае свае абмежаванні. Як паказаў у тым ліку вопыт канца 2022-га і 2023 года, з яго дапамогай сапраўды можна часова спыніць рост коштаў. Аднак у гэтым раскладзе не ўлічваюцца доўгатэрміновыя наступствы. У тым ліку неэфектыўнае размеркаванне шкоды паміж вытворцам, пастаўшчыком і спажыўцом.

- Чыноўнікі арыентаваныя ў першую чаргу на зніжэнне незадаволенасці насельніцтва, што прыводзіць да таго, што праблема інфляцыі становіцца цяжарам для вытворцы або пастаўшчыка, - паказваюць эканамісты праекта «Вашы грошы». - Ва ўмовах немагчымасці карэктаваць цэны ў адпаведнасці са змяненнем рынкавай кан'юнктуры бізнэс вымушан зніжаць сваю эфектыўнасць. Працяглая праца ў такіх умовах немагчымая, і многія прадпрыемствы асуджаныя на банкруцтва, што ўжо назіраецца на нашым рынку.

Эканамісты падкрэсліваюць, што дазволіць сабе працяглую неэфектыўную працу могуць толькі дзяржпрадпрыемствы, бо яны атрымліваюць падтрымку ад бюджэту праз субсідыі, падатковыя льготы, спісанне страт ці дырэктыўнае і льготнае крэдытаванне. У выніку такой эканамічнай палітыкі неэфектыўныя прадпрыемствы працягваюць функцыянаваць, у той час як больш эфектыўныя бізнэсы змушаныя пакідаць рынак пад дзеяннем наступстваў ручнога рэгулявання.

- Хоць звычайны спажывец першапачаткова можа не адчуць негатыўных наступстваў ручнога рэгулявання коштаў, з цягам часу ён сутыкнецца з памяншэннем асартыменту, якасці тавараў і паслуг, - кажуць эксперты праекта «Вашы грошы». - Бюджэт таксама адчуе страты ад памяншэння падатковых паступленняў. Гэта, у сваю чаргу, прывядзе да зніжэння эфектыўнасці ўсёй эканомікі і змяншэння магчымасцей казны для падтрымкі дабрабыту насельніцтва.

У канчатковым выніку росту коштаў, выкліканага рынкавымі фактарамі, нельга будзе пазбегнуць, працягваюць аналітыкі. Ручное рэгуляванне не залагоджвае праблему інфляцыі, а толькі крыху аддаляе яе. Таму да моманту, калі павышэнне цэн станецца непазбежным, эканоміка будзе мець менш эфектыўных прадпрыемстваў, а бюджэту будзе больш складана забяспечыць дастатковую падтрымку росту даходаў насельніцтва для кампенсацыі інфляцыі.