Беларусы пабеглі ў абменнікі

Здаюць даляры і еўра.

Актыўны продаж беларусамі валюты ў лютым дазволіў Нацбанку падтрымаць золатавалютныя рэзервы, адзначаюць экспэрты Еўразійскага банка развіцця. Гэта дапамагло перакрыць страты ад падзення коштаў на золата на сусветным рынку. Нагадаем, ЗВР за мінулы месяц года павялічыліся на 125,1 млн даляраў - да 8 218,6 млн. Два папярэднія месяцы гэты паказчык скарачаўся, прычым лютаўскі рост не змог перакрыць падзенне ў студзені і снежні, піша «Зеркало».

"Прырост (ЗВР у лютым. - Заўвага. рэд.) быў забяспечаны павелічэннем рэзервовых актываў у замежнай валюце на 146,2 млн дал. Пры гэтым кошт золата ў складзе рэзерваў зменшыўся за месяц на 10,7 млн даляраў за кошт нязначнага зніжэння кошту", - адзначаюць у ЕАБР.

Экспэрты тлумачаць, што рост ЗВР стаў магчымы з-за валюты, якую ў лютым здавала ў абменнікі насельніцтва.

"Рэзервы выраслі на фоне чыстай прапановы замежнай валюты на ўнутраным валютным рынку сумай 37 млн даляраў, сфарміраваным шмат у чым чыстым продажам замежнай валюты насельніцтвам сумай 168 млн даляраў за люты ў параўнанні з чыстай купляй 14 млн даляраў месяцам раней", — удакладняюць у ЕАБР.

Прасцей кажучы, беларусы ў лютым прадалі банкам валюты на 168 млн. больш, чым купілі. У студзені сітуацыя была супрацьлеглай: купілі на 14 млн даляраў больш, чым прадалі.

З пачатку гэтага года золатавалютныя рэзервы Беларусі выраслі на 91,2 млн даляраў.

Нагадаем, за 2023 год ЗВР выраслі на 197,9 млн даляраў - да 8 млрд 127,4 млн. Сярод прычын - падаражанне золата.

Чыноўнікі плануюць, што на канец 2024 года ЗВР павінны складаць не менш за 6 млрд даляраў. Нацбанк раней заяўляў, што супольна з урадам мае намер прадоўжыць працу ў падтрыманні ЗВР, што "будзе садзейнічаць падвышэнню эканамічнай бяспекі краіны і забеспячэнню фінансавай стабільнасці".