Навукоўцы выявілі садавіну, якая хутка паляпшае настрой

У даследаванні ўдзельнічалі 155 чалавек.

Ківі – гэта смачная і карысная садавіна, якую можна ўжываць у свежым выглядзе, дадаваць у салаты, смузі ці іншыя стравы. Ківі таксама змяшчае антыаксіданты, якія могуць дапамагчы абараніць клеткі ад пашкоджанняў.

Даследнікі з Універсітэта Атага (Новая Зеландыя) выявілі, што ўжыванне ківі можа хутка павысіць настрой. У даследаванні ўдзельнічалі 155 дарослых з невялікім дэфіцытам вітаміну С.

Удзельнікі штодня прымалі дадатак з вітамінам С, плацэба або з'ядалі два ківі. Таксама з дапамогай апытанняў у спецыяльным дадатку яны паведамлялі пра свой настрой, стан здароўя, якасць і колькасць сну, і фізічную актыўнасць.

Ужыванне ківі палепшыла жыццёвы тонус і настрой удзельнікаў цягам чатырох дзён, а праз 14–16 дзён узровень жыццярадаснасці добраахвотнікаў дасягнуў піка. З іншага боку, спажыванне дадатку з вітамінам С толькі малаважна палепшыла настрой удзельнікаў праз 12 дзён.

«Гэтае даследаванне дапамагае нам зразумець, што ежа, якую мы ямо, можа даволі хутка паўплываць на наша самаадчуванне. Нашы ўдзельнікі першапачаткова мелі добрае псіхічнае здароўе, таму ў іх было мала магчымасцяў для паляпшэнняў стану, але яны ўсё ж паведамілі пра карысць спажывання ківі і дадатку з вітамінам С», – сказаў доктар Бэн Флэтчар, асноўны аўтар даследавання.