У Менску затрымалі падлеткаў, якія падкінулі валасы ў ежу, каб не плаціць за абед

Момант трапіў на ўтоеную камеру.

У сталічным бістро затрымалі двух падлеткаў, якія спрабавалі падмануць персанал. Яны заявілі, што знайшлі ў ежы валасы, і запатрабавалі яшчэ адну порцыю дарма. Але дзякуючы камерам назірання іх падман выявіўся, паведамляе прэс-служба менскага ГУУС, піша tut.by.

Падлеткі пасварыліся з адміністрацыяй рэстарацыі праз валасы, нібыта выяўленыя ў замове. За маральную шкоду яны запатрабавалі бясплатна замяніць страву.

Але персанал западозрыў нядобрае, а прагляд запісаў з камер паказаў: госці самі ж і падкінулі валасы ў ежу.

«Акрамя таго, ахоўнік апазнаў скаржнікаў: раней яны такім жа чынам пракруцілі падобную афёру ў іншай рэстарацыі грамадскага харчавання. Там ім пашанцавала больш - яны атрымалі заказ бясплатна ўзамен на «сапсаваны», - кажуць у ГУУС.

У выніку хлопца і дзяўчыну даставілі ў Цэнтральнае РУУС для разбору і вынясення прававой адзнакі.