Анатоль Грыцэнка: Чакаем указа з датай галасавання

Лідар партыі «Грамадзянская пазіцыя» заявіў, што гатовы да датэрміновых выбараў у Вярхоўную Раду Украіны.

Партыя «Грамадзянская пазіцыя» гатова да датэрміновых выбараў у Вярхоўную Раду. Пра гэта 20 траўня ў Facebook заявіў лідар палітычнай сілы Анатоль Грыцэнка, паведамляе gordonua.com.

«Роспуск Рады і датэрміновыя выбары падтрымліваем. Мы да іх гатовыя і прымем удзел. Новай Радзе і новаму ўраду патрэбная новая якасць - прафесіяналізм і сумленнасць. Тады наша краіна сапраўды атрымае шанец. Чакаем указа з датай галасавання», - напісаў ён.

21 красавіка 2019 года ва Украіне прайшоў другі тур выбараў прэзідэнта. 30 красавіка ЦВК Украіны афіцыйна абвясціў вынікі выбараў, перамогу атрымаў Уладзімір Зяленскі з вынікам 73,22% галасоў выбарцаў. 20 траўня ён афіцыйна ўступіў на пасаду прэзідэнта Украіны.

Падчас сваёй інаўгурацыйнай прамове 20 траўня Зяленскі абвясціў аб роспуску Рады. Адразу пасля цырымоніі прэзідэнт паабяцаў СМІ, што першы яго ўказ будзе тычыцца роспуску парламента.

Першым указам Зяленскага стаў дакумент аб прыняцці паўнамоцтваў вярхоўнага галоўнакамандуючага Узброенымі сіламі Украіны.