«І тут падманулі»: беларусы пачалі праходзіць тэхагляд «па-старому»

Чаму Лукашэнка зацягвае падпісанне новага ўказу?

Надышоў красавік, а ў раздзеле выплат дзяржаўнага збору за допуск транспартных сродкаў да ўдзелу ў дарожным руху ўсё засталося па-ранейшаму. Праект указа аб змене гэтага плацяжу знаходзіцца на стадыі падпісання ў Лукашэнкі, але калі ён будзе зацверджаны (і ці будзе), невядома, піша журналіст abw.by Іван Крышкевіч:

- Уласна кажучы, гэта галоўная прычына, чаму, не дачакаўшыся 1 красавіка змяненняў у гэтай частцы, не ўбачыўшы іх 2-га і 3-га, я ўсё ж наважыў прайсці ТА «па-старому», гэта значыць з аплатай дзяржаўнага збору. Хоць адзін аўтамабіль у сям'і павінен быць у парадку ў плане дакументаў. Бо і ўночы даводзіцца ездзіць, і ў Бараўляны, і ў Астрашыцкі гарадок - а ў гэтых выпадках імавернасць сустрэцца з экіпажам ДАІ на дзяжурстве вельмі вялікая. І, наколькі я ведаю, такой практыкі пільнуюцца многія знаёмыя: «асноўны» аўтамабіль ўсё ж мае дзейны тэхагляд.

Чаго напраўду чакаць? Тое, што зробяць зніжку 20%? Магчымасць памесячнай аплаты ў гэтым выпадку неактуальная: аўто ездзіць круглы год. Але, от халера, плаціць 306 рублёў адной аплатай - гэта балюча! Асабліва калі не ўпэўнены, што аўто яшчэ дакладна прабудзе у сям'і два гады. І калі ёсць імавернасць, што не сёння-заўтра ўмовы аплаты дзяржаўнага збору зменяцца.

Але нічога не зробіш. Іду ў банк і атрымліваю запаветную паперку.

Нароўні з аптэчкай, вогнетушыцелем і знакам аварыйнага прыпынку квітанцыя аб аплаце дзяржаўнага збору па-ранейшаму абавязковы элемент, без якога лінію тэхагляду пройдзеш, але допуск да ўдзелу ў дарожным руху не атрымаеш. Такім чынам, увесь набор сабраны, можна і на лiнiю дыягностыкі!

Прыязджаю на сваю ўлюбёную станцыю дыягностыкі, дзе працу сваю ведаюць, па дробязях не чэпяцца і агулам адэкватна падыходзяць да працэсу - і разумею, што змяненняў у заканадаўстве стаміўся чакаць не толькі я. Чарга з шасці аўто - такога я даўно тут не бачыў!

- Нешта зашмат у вас людзей сёння, - размаўляем з жанчынай, якая прымае плату за ТА.

- Так, нешта раптам паехалі. З раніцы нікога не было, а тут раптам адзін за адным...

У чарзе на лінію дыягностыкі - абмеркаванне на тэму «не дачакаліся».

- Ну а што, ездзіць жа трэба! Чакаў да канца сакавіка, потым да красавіка...

- Ну так, і тут падманулі!

- Чакаў да апошняга, але заўтра ў выправу, лепш каб дакументы ў парадку былі. Але за два гады плаціць - шмат! Я гэтыя грошы, лічы, ужо на іншае амаль выдаткаваў ...

На самой лініі ўсё як заўсёды. Майстар метадычна праверыў СА, працу светлавых прыбораў, тармазы і падвеску: «Пакідайце аўто пад навесам і падыходзіце сюды з талонам тэхагляду».

А пад навесам усё занята! Сапраўды вельмі шмат аўто. Хтосьці нават на Bentley прыехаў!

І вось апошні пункт - афармленне папер, дакладней, дазволаў на допуск МС да ўдзелу ў дарожным руху. Прайшоўшы зверку нумару і сабраўшы ўсе дакументы ў пачак, зноў чакаю ў чарзе.

- Дык дзяржаўны збор усё ж патрэбны? - пытаецца ў інжынера хтосьці з кіроўцаў.

- Так, патрэбны.

- Выходзіць, навіны пра закон - першакрасавіцкі жарт?

- Калі б гэта было 1 красавіка, можна было б так успрыняць. «Жартаваць» жа пачалі года паўтара назад! - слушна заўважае нехта з чаргі.

Што і казаць, «жартаваць» у нас дзяржава любіць. Праўда, «жарты» ўсе нешта не дужа вясёлыя і прыемныя для аўтаўладальнікаў. Ну а асабіста мне застаецца радавацца толькі таму, што ў бліжэйшыя два гады з дакументамі на аўто ўсё ў парадку. Калі, вядома, улада заможных яшчэ чаго не прыдумае...