ЕАБР: У Беларусі паскорыцца рост коштаў
4- 22.04.2019, 18:46
- 12,389
Таксама ў Беларусі замарудзяцца тэмпы росту ВУП.
У 2019 годзе ў Беларусі замарудзяцца тэмпы прыросту валавога ўнутранага прадукту, а вось тэмпы росту інфляцыі, наадварот, паскорацца. Пра гэта гаворыцца ў красавіцкім макрааглядзе Еўразійскага банка развіцця.
У ЕАБР мяркуюць, што заканчэнне фазы аднаўлення эканомікі знізіць тэмпы прыросту ВУП краіны да 1,5%. Таксама прагназуецца запаволенне росту спажывецкага попыту, бо знізяцца тэмпы павелічэння заробкаў і крэдытная актыўнасць грамадзян. Стрымліваць інвестыцыйную актыўнасць будуць і больш жорсткія ўмовы банкаўскага крэдытавання, тады як запаволенне эканамічнага росту ў Расеі і Еўразвязе будзе стрымліваць рост беларускага экспарту.
Ключавым рызыкай для беларускай эканомікі ў аналізе называецца геапалітычная напружанасць у рэгіёне, калі патэнцыйнае ўзмацненне заходніх санкцый што да Расеі можа негатыўна паўплываць і на Беларусь.
Інфляцыя ў 2019 годзе, на думку аўтараў агляду, складзе 5,7%, што больш за арыенцір Нацбанка - 5% за год.
У 2019 годзе беларускі рубель будзе аслабляцца павольнымі тэмпамі. У сярэднетэрміновым перыядзе паслабленне нацыянальнай валюты захаваецца, бо інфляцыя ў Беларусі больш высокая ў параўнанні з асноўнымі гандлёвымі партнёрамі.
Што тычыцца росту курсаў валют, то асноўныя рызыкі для рубля ляжаць у геапалітыцы, бо курс беларускай валюты да даляра моцна залежыць ад курсу расейскага рубля, падсумавалі ў ЕАБР.