У Віцебску жаўнера тэрміновай службы прыціснула аўтамабілем
4- 22.04.2019, 16:10
- 22,333
Пацярпелы ў рэанімацыі.
Тэлеграм-канал NEXTA паведаміў аб НЗ у Віцебскай 103-й дэсантнай брыгадзе. Сёння раніцай машынамі прыціснула жаўнера. У Мінабароны і лякарні хуткай дапамогі tut.by пацвердзілі інфармацыю.
- Камісія сіл спецыяльных аперацый ажыццяўляе праверку ў сувязі з парушэннем правілаў эксплуатацыі аўтамабільнай тэхнікі вайскоўцам тэрміновай вайсковай службы, у выніку чаго атрымаў траўму ягоны калега, - паведаміў журналістам прэс-сакратар Мінабароны Уладзімір Макараў. - Яму нададзеная медыцынская дапамога, ён шпіталізаваны.
Жаўнер тэрміновай службы, які быў за стырном аўто, знаходзіцца ў вайсковай частцы. Пацярпелы ў рэанімацыі, ягоны стан ацэньваюць як цяжкі, паведамілі журналісты ў Віцебскай лякарні хуткай дапамогі.
За апошнія месяцы гэта не першы выпадак, звязаны з траўмаваннем вайскоўцаў у 103-й гвардзейскай паветрана-дэсантнай брыгадзе, якую называюць паказальнай.
У снежні 2018 года старшы сяржант Аляксей Раманенка загадаў малодшым па званні кульнуцца праз металічную агароджу, пры гэтым аднаго з іх ударыў нагой, а другі вайсковец падчас куляння зламаў ключыцу. Раманенку звольнілі ў запас, паводле кантракту ён прапрацаваў прыкладна паўгода, у дачыненні да яго распачатая крымінальная справа па факце перавышэння ўлады, спалучанага з гвалтам.