Чаму некаторыя дзеці з Калодзішчаў вымушаны ездзіць у школу за 30 кіламетраў
8- 22.04.2019, 10:38
- 9,726
У рэгіёне не стае як мінімум 16 дзіцячых садкоў і чатырох школ.
Праблема ўладкавання дзяцей ва ўстановы адукацыі, прымусіла жыхара Менскага раёна Аляксандра Сяргеевіча звярнуцца на жывую лінію Мінаблвыканкама, піша mlyn.by.
- Надоечы ў нас была сустрэча са старшынём нашага райвыканкама, - растлумачыў Аляксандр Сяргеевіч. - На ёй жыхарам паведамілі, што неўзабаве ў Калодзішчах будуць будаваць школу, але канкрэтных тэрмінаў не пазначылі.
Мужчына распавёў, што праз татальны брак месцаў у Калодзішчанскай школе і дзіцячых садках, штодня дзяцей даводзіцца вазіць у сталічную Серабранку. А гэта прыкладна 30 кіламетраў у адзін бок.
- Гэта досыць далёка. Мы хацелі паспрабаваць патрапіць у школу ў мікрараёне Уручча, але і там месцаў зусім няма, - з сумам канстатаваў Аляксандр Сяргеевіч.
Намеснік старшыні Менаблвыканкама Іван Маркевіч, які праводзіў жывую лінію, паведаміў: цяпер вядзецца актыўны пошук фінансавання для ўзвядзення ўстановы адукацыі.
- Сёння ў Менскім раёне склалася такая сітуацыя, што ў рэгіёне не стае як мінімум 16 дзіцячых садкоў і чатырох школ. Канкрэтна ў гэтым выпадку пабудова ўстановы адукацыі запланаваная спецыяльнай праграмай на 2019-2020 гады. Разглядаецца пытанне аб крыніцы фінансавання.