Кітай адмовіўся дзяліць з Расеяй прыбытак ад авіябудавання

Кітайцы выціскаюць РФ з праекта аб стварэнні пасажырскіх самалётаў.

Спроба стварыць супольна з Кітаем першы з часоў СССР шырокафюзеляжны расейскі пасажырскі самалёт павярнулася праблемамі для Аб'яднанай авіябудаўнічай карпарацыі, паведамляе finanz.ru.

Як паведамілі «Ведомостям» дзве блізкія да ААК крыніцы, пагадзіўшыся падзяліць папалам выдаткі на стварэнне лайнера CR929 (20 млрд даляраў), кітайскі партнёр у асобе СОМАС не жадае дапускаць Расею да атрымання даходаў ад продажу самалёта на ключавым, кітайскім рынку.

COMAC прапануе падзяліць продажы: усярэдзіне Кітая, дзе попыт на самалёт складзе больш за тысячу штук найбліжэйшыя 20 гадоў, прадаваць яго будзе кітайская кампанія. Расеі ж прапануецца атрымліваць даходы ад продажу ў сябе, дзе ёмістасць рынку значна меншая (усяго 50-120 самалётаў), а таксама ў свеце, дзе яму давядзецца канкураваць з мадэлямі ад Boeing і Airbus.

Гэта ставіць пад пагрозу ўвесь праект, бо прапанаваная кітайцамі схема пазбаўляе яго якога-небудзь сэнсу для расейскай стараны, наракаюць крыніцы «Ведомостей»: ідэя акурат і палягала ў тым, каб выйсці на кітайскі рынак і там «адбіць» выдаткі.

Фактычна Кітай прапануе Расеі ўзяць на сябе камерцыйныя рызыкі прасоўвання самалёта на замежныя рынкі і пры гэтым адмовіцца ад удзелу ў прыбытку ад продажу на самым перспектыўным для яго рынку, паказвае вядучы навуковы супрацоўнік Інстытута эканомікі транспарту Фёдар Барысаў.

Ёсць у старон і іншыя сур'ёзныя супярэчнасці, распавялі тры чалавекі, блізкіх да ААК: пра краіну, у якой будзе атрыманы сертыфікат тыпу на CR929. ААК планавала, што паколькі яна будзе асноўным праекціроўшчыкам, то і трымальнікам сертыфіката стане яе структура, зарэгістраваная ў Расеі.

Кітай жа намагае, каб сертыфікат атрымлівала кітайская кампанія, і з ім вельмі складана весці перамовы, кажа суразмоўца ў ААК.

Фактычна кітайцы выціскаюць Расею з праекта. ААК сур'ёзна разглядае варыянт, пры якім замест парытэтнага партнёрства яна стане толькі выканаўцам для кітайскай СОМАС, прадаўцом праекту, тэхналогіі і дэталяў.

Згодна з такой схемай, напрыклад, плануецца супрацоўніцтва з Кітаем іншага холдынгу - «Верталёты Расеі»: ён распрацуе асобныя вузлы для кітайскага цяжкага гелікаптэра.

Нягледзячы на жорсткую пазіцыю Пекіна, інжынерная праца працягваецца: Кітай атрымлівае дакументацыю і кампетэнцыі. Да вырашэння ўсіх пытанняў варта было б усё спыніць, але гэта пытанне палітычнае, канстатуе крыніца ў ОАК.