Крыміналісты назвалі прычыну пажару ў базіліцы Парыжскай Маткі Боскай

Асяродак узгарання быў размешчаны ля падмурку шпіля базілікі.

Крыміналісты, якія расследуюць прычыны пажару ў базіліцы Парыжскай Маткі Боскай у сталіцы Францыі, мяркуюць, што прычынай узгарання стала "праблема з электрыкай", паведамляе 16 красавіка Le Parisien (пераклад - gordonua.com).

Паводле версіі спецыялістаў, асяродак узгарання быў размешчаны ля падмурку шпіля сабора.

Крыміналісты мяркуюць, што пажар мог пачацца альбо праз кароткае замыканне, альбо праз няспраўнасці схаванай праводкі.

Пажар у саборы ўспыхнуў 15 красавіка. Паводле папярэдняй інфармацыі, ён адбыўся праз рамонтныя работы ў будынку.

У базіліцы абрынуўся шпіль і дах. У МУС Францыі заявілі, што асноўную канструкцыю сабора атрымалася выратаваць.

Зранку 16 красавіка пажар цалкам ліквідавалі. Яго расследуюць як няшчасны выпадак.

Прэзідэнт Францыі Эмануэль Макрон заявіў 16 красавіка, што базіліка павінна быць адноўленая цягам пяці гадоў. Для рэстаўрацыі храма адкрылі агульнанацыянальны збор ахвяраванняў.