Навуковец: Здымак чорнай дзіркі пацвердзіў тэорыю адноснасці Эйнштэйна

У сераду Event Horizon Telescope апублікаваў першы здымак чорнай дзіркі.

Першы рэальны малюнак чорнай дзіркі ў галактыцы М87 пацвердзіў вернасць агульнай тэорыі адноснасці Эйнштэйна, заявіў у сераду супрацоўнік канадскага ўніверсітэта Уотэрлу, удзельнік праекта Event Horizon Telescope Эверэ Брадэрык, паведамляе ria.ru.

У сераду Event Horizon Telescope апублікаваў першы здымак чорнай дзіркі, атрыманы з дапамогай сеткі радыётэлескопаў, якія пачалі назіранне за аб'ектам у цэнтры галактыцы М87 у красавіку 2017 года.

«Сёння (тэорыя) агульнай адноснасці прайшла яшчэ адно значнае выпрабаванне», - сказаў удзельнік праекта, прызнаўшыся, што пачынаючы праект, яго каманда не ведала, што знойдзе.

Як распавёў Брадэрык, чорная дзірка ў цэнтры галактыкі круціцца па гадзіннікавай стрэлцы, на здымку бачнае яркае кола вакол цёмнага асяродку. Усё гэта, з ягоных слоў, дае навукоўцам падставы рабіць упэўненую выснову пра тое, што «аб'ект у цэнтры М87... з'яўляецца чорнай дзіркай, такой, як іх апісвае агульная тэорыя адноснасці».

Акрамя гэтага, адзначыў навуковец, малюнак, супастаўны з атрыманымі раней звесткамі, пацвярджае ключавое прадказанне тэорыі гравітацыі Эйнштэйна: усе вядомыя чорныя дзіркі падыходзяць пад адно апісанне. «Вялікія ці маленькія чорныя дзіркі падобныя адна на адну. Што мы даведаемся пра адну - абавязкова пасуе да іншых», - рэзюмаваў Брадэрык.

Праект Event Horizon Telescope аб'ядноўвае некалькі радыётэлескопаў, размешчаных у розных пунктах свету. У 2017 годзе сетка складалася з васьмі апаратаў, і будзе пашырацца.