У Польшчы распрацуюць тры версіі электрычнага аўтамабіля

Кампанія мае намер распрацаваць тры версіі аўтамабіля ў папулярным C-сегменце.

Кампанія ElectroMobility Poland будзе распрацоўваць тры версіі кампактнага польскага электрычнага аўтамабіля, - заявіў прэзідэнт кампаніі Пётр Зарэмба. Ён дадаў, што праца над праектам будзе доўжыцца больш за тры гады, а першыя электрычныя аўтамабілі павінны з'явіцца прыкладна праз 4 гады, паведамляе «Польскае Радыё».

Кіраўнік ElectroMobility Poland удакладніў, што кампанія мае намер распрацаваць тры версіі аўтамабіля ў папулярным C-сегменце. Усе яны будуць пабудаваныя на агульнай платформе, каб мінімізаваць выдаткі. Паводле класіфікацыі Еўрапейскай эканамічнай камісіі, С-сегмент - гэта еўрапейскі самы нізкі сярэдні клас, «гольф-клас».

Польскі электрычны аўтамабіль будзе створаны ў супрацоўніцтве з нямецкай кампаніяй EDAG Engineering, якая мае філіялы на тэрыторыі Польшчы.

Як сказала кіраўніца ElectroMobility Poland, «выбар замежнага партнёра быў прадыктаваны адсутнасцю польскага суб'екта, які б валодаў усімі навыкамі, неабходнымі для стварэння электрычнага аўтамабіля». «У сувязі з гэтым мы самастойна працавалі над бізнэс-канцэпцыяй праекта, але нам былі патрэбныя партнёры, якія маюць досвед працы на кожным з этапаў стварэння машыны», - дадаў ён.

Завод у вытворчасці польскіх электрамабіляў каштавацьме 2 мільярды злотых, [больш за 450 мільёнаў еўраў], - сказаў прэзідэнт кампаніі ElectroMobility Poland. Будаўніцтва будзе доўжыцца ад 2 да 3 гадоў.

«На мяжы 2022 і 2023 гадоў мы запусцім масавую вытворчасць польскіх электрычных аўтамабіляў», - паабяцаў Пётр Зарэмба. Ён дадаў, што «спачатку з канвеера будзе схадзіць 100 тысяч аўтамабіляў на год, у канчатковым выніку завод будзе вырабляць 200 тысяч аўтамабіляў у некалькіх сегментах».

З ягоных слоў, «кошт электрамабіляў, якія даступныя цяпер на аўтамабільным рынку, з'яўляецца асноўным бар'ерам для статыстычнага Кавальскага». Ён звярнуў увагу, што сітуацыя імкліва змяняецца. «Сукупны кошт валодання аўтамабілем, які ўключае ў сябе кошт пакупкі, паліва, абслугоўвання, запчастак, у выпадку электрычнага аўтамабіля праз некалькі гадоў будзе ніжэйшы, чым аўтамабіля з рухавіком унутранага згарання», - растлумачыў Пётр Зарэмба.

Прэзідэнт ElectroMobility Poland выказаў надзею, што пасля першых некалькіх гадоў вытворчасці, пасля стварэння брэнда, кампанія зможа выйсці за межы Польшчы.

Кампанія з'яўляецца адным з элементаў плана развіцця сектара электрамабільнасці, уключанага ў Стратэгію адказнага развіцця або, як яе яшчэ называюць, «план Маравецкага». Згодна з гэтай стратэгіяй, адным з прыярытэтаў цяперашняга ўрада з'яўляецца рэіндустрыялізацыя і развіццё інавацыйных кампаній.

Згодна з гэтай стратэгіяй, да 2025 года па польскіх дарогах будзе ездзіць за 1 млн электрамабіляў. У сваю чаргу, развіццё электрамабіляў пацягне за сабой развіццё інавацыйнай прамысловасці і электрасетак.