Леў Марголін: Чыноўнікі не могуць паўплываць на законы эканомікі

Эканаміст расказаў, чаму кіраўніца адміністрацыі Лукашэнкі не паўплывае на рост коштаў.

Беларускі кіраўнік даў даручэнне Наталлі Качанавай тэрмінова ўзяць пад кантроль рост коштаў. Што з гэтага атрымаецца - тлумачыць «Радыё Рацыя» эканаміст Леў Марголін.

- Ад Качанавай тут мала што залежыць, бо ўлада на словах турбуецца пра рост коштаў, а ў той жа час падпісвае дакументы аб іх павышэнні. На днях быў падпісаны дакумент, які прадугледжвае павышэнне акцызаў на паліва, а што гэта значыць? Паліва - гэта ўсё ў эканоміцы, бо ў кошце любога прадукту закладзены яго кошт. Калі вырастуць акцызы, то вырастуць і кошты. Які б мы тавар не купілі - ад хлеба да ровара - ва ўсім будзе закладзенае павышэнне акцызаў. Таму не ведаю, як кіраўнік адміністрацыі вырашыць пастаўленую задачу.

- Якія яшчэ фактары ўплываюць на рост коштаў?

- Акрамя ўсяго іншага, апошнім часам ёсць рост курсаў замежных валют - даляра і еўра, а значыць, што ўсе імпартныя складнікі даражэюць. Маецца таксама нейкі рост заробкаў, і гэта таксама аказвае пэўны ўплыў на кошты. Але гэта ўсё - законы эканомікі, на якія паўплываць чыноўнікі не могуць.

- Рост коштаў працягнецца?

- Думаю, будзе павольнае павышэнне, бо ніякіх эканамічных рэформаў не праводзіцца і ў будучыні не прадбачыцца. А тое, што робіцца цяпер, паказвае, што кошты працягнуць расці.

Да таго ж, на бліжэйшыя пяць гадоў у нас ужо закладзена павышэнне коштаў сыравіны для нафтаперапрацоўчых прадпрыемстваў, а гэта азначае, што і далей прыйдзецца падвышаць кошты на паліва і ўсё астатняе.