МЗС Украіны запатрабавала ад РФ спыніць пераслед крымскіх татараў
- 27.03.2019, 17:26
- 7,879
У анэксаваным Крыме расейскія сілавікі затрымалі 20 крымскіх татараў.
Міністэрства замежных спраў Украіны патрабуе ад Расеі спыніць пераслед крымскіх татараў у анэксаваным ёю Крыме. Пра гэта ў сваім Twitter паведаміла спікер Міністэрства замежных спраў Украіны Кацярына Зелянко, піша «Гордон».
«Прадаўжаюцца парушэнні правоў чалавека ў акупаваным Крыме з незаконнымі начнымі ператрусамі і затрыманнямі ў дзясятках дамоў мірных крымскіх татараў. Мы патрабуем, каб Расея спыніла гэтыя незаконныя і палітычна матываваныя пераследы», - падкрэсліла Зелянко.
Further #humanrights abuses in occupied #Crimea with illegal overnight searches & detentions in dozens of homes of peaceful Crimean Tatar citizens. We demand #Russia ceases these unlawful & politically motivated persecutions. #CrimeaIsUkraine pic.twitter.com/pvnnzIq0zN
— Kateryna Zelenko (@KaterynaZelenko) 27 марта 2019 г.
Агенцтва ТАСС са спасылкай на прэс-службу ФСБ РФ сёння паведаміла, што сілавікі праводзяць ператрусы ў падазраваных ва ўдзеле ў «Хізб ут-Тахрыр». Пазней стала вядома пра 20 затрыманых.
Арганізацыя «Крымская салідарнасць» паведаміла, што некаторым татарам падчас ператрусу падкінулі забароненую літаратуру.
Расея анэксавала Крым пасля сілавой блакады ўкраінскіх вайсковых частак і незаконнага рэферэндуму 16 сакавіка 2014 года. Далучэнне паўвострава да РФ не прызнаецца Украінай і большасцю краін свету.
Пасля анэксіі Крыма, паводле звестак праваабаронцаў міжнароднай арганізацыі Human Rights Watch, сітуацыя з правамі чалавека на паўвостраве значна пагоршылася. На розных падставах, уключаючы барацьбу з экстрэмізмам, улады пераследуюць людзей, якія асмельваюцца адкрыта крытыкаваць дзеянні Расеі на паўвостраве, асабліва - крымскіх татараў.
