Суд адмовіў Марыі Тарасенцы ў пазове да «дармаедскай» камісіі

Гомелька патрабуе ад дзяржавы 1 000 рублёў кампенсацыі за ўключэнне ў базу «дармаедаў».

Сёння суд Чыгуначнага раёна Гомеля прыняў пастанову паводле справы хатняй гаспадыні Марыі Тарасенкі супраць камісіі, якая прыраўняла гомельку да «дармаедаў». Жанчыне адмовілі ў пазове, паведамляе tut.by.

Суд Чыгуначнага раёна адмовіў Марыі Тарасенцы ў яе пазоўных патрабаваннях.

Нагадаем, пазоў аб кампенсацыі маральнай шкоды хатняя гаспадыня адрасавала да камісіі ў садзейнічанні занятасці насельніцтва Чыгуначнага раёна Гомеля і Камітэта працы, занятасці і сацабароны. Пазней суд дадаў да суадказніка адміністрацыю раёна і фінансавую ўправу горада і вобласці. Сваю шкоду пазоўніца ацаніла на адну тысячу рублёў.

Гадоў 10 таму Марыя звольнілася з працы і стала хатняй гаспадыняй. 15 студзеня на яе мабільны патэлефанавала майстар з домакіраўніцтва і спытала, ці працаўладкавалася яна. А затым паведаміла, што з 1 студзеня для Марыі, паколькі яна ўласніца кватэры і не працуе, падвышаюцца тарыфы на падагрэў вады. Марыя палічыла і жахнулася - пераплачваць давядзецца блізу 100 рублёў, і гэта яшчэ без цяпла і газу!

Марыя надумала давесці: да «асоб, якія не ўдзельнічаюць у фінансаванні дзяржвыдаткаў» яе залічылі незаконна.

Спачатку яна з дапамогай юрыстаў прафзвязу РЭП склала скаргу ў гарвыканкам - у якой спасылалася на тое, што дармаедскі дэкрэт неканстытуцыйны. Прыйшоў адказ, што даваць ацэнку дэкрэтам мясцовыя ўлады не маюць права. Тады Марыя падала скаргу ў суд. Адтуль таксама прыйшла адмова ў сувязі з непадлегласцю пытання суду.

Тады хатняя гаспадыня звярнулася ў суд, але ўжо з іншай заявай - запатрабавала кампенсацыі прычыненай ёй маральнай шкоды.

Юрысты прафзвязу РЭП Леанід Судаленка і Андрэй Стрыжак, якія прадстаўлялі ў судзе інтарэсы Марыі, намагалі, што хатняя гаспадыня не павiнна быць у дармаедскіх спісах і не мусіць аплачваць рахункі камерцыйнымі коштамі - яна хоць і не працуе па найму, але ўдзельнічае ў эканоміцы краіны, бо выплачвае ўскосныя падаткі падчас купляў у краме.