Як беларусы дапамагаюць самотнаму бацьку вярнуць дзяцей, адабраных дзяржавай

Адгукнуліся дзясяткі чалавек.

Пасля сюжэту на «Белсаце» аб трагедыі на Гарадзеншчыне, калі жанчына скончыла жыццё самагубствам пасля таго, як сацыяльныя службы забралі дзяцей, гледачы «Белсату» захацелі дапамагчы сям'і.

Сачыла і брала ўдзел у гэтым і Вольга Чайчыц.

«Белсат» рабіў сюжэт аб гэтай трагедыі. У вёсцы Вайкунцах Воранаўскага раёна чатырох дзяцей забралі ў прытулак за антысанітарыю, а вечарам іх маці знайшлі ў пятлі. Пасля выхаду сюжэту гледачы сталі пытацца, як яны могуць дапамагчы. Андрэй Козел, журналіст «Белсата»:

«Іх набралася досыць вялікая колькасць, і я падумаў, чаму б не паспрабаваць арганізаваць гэтых усіх людзей. Узяў на сябе саму арганізацыю збору дапамогі, арганізацыю дастаўкі да Воранава».

Інфармацыю пра збор размясцілі ў сацыяльных сетках. Людзі пачалі пералічваць грошы на рахунак бацькі. Адгукнуліся амаль 50 чалавек, якія перадавалі рэчы ці дапамагалі збіраць гэтыя рэчы ў менскіх кватэрах.

«Сітуацыя сумная, таму людзі павінны прыходзіць адзін аднаму на дапамогу», - кажа валанцёр Уладзімір Куклін.

«Я спадзяюся, што ў гэтай сітуацыі будуць разбірацца праваахоўныя органы. Таму што калі маці 4-х дзяцей вызначае, што яна ўжо нічога не выправіць, гэта знак перш за ўсё органам улады, што ў іх дзеяннях ёсць нейкая памылка», - кажа валанцёр Сергій Мельянец.

Сям'ю прымушалі пераехаць у новую кватэру ў Воранава, якую ў снежні ім выдалі як шматдзетнай. Цяпер абяцаюць, што дзяцей аддадуць, калі бацька ўладкуе кватэру, знойдзе новую працу ў Воранаве. Большасць таго, што было патрэбнае для кватэры, ужо сабралі. Людзі ахвяравалі посуд, цацкі, тэкстыль, адзенне, шмат мэблі. Мы тры дні збіралі гэта ўсё па Менску і ўсіх не паспелі аб'ехаць. А яшчэ было шмат ахвотных у іншых гарадах.

Мясцовыя жыхары не разумеюць, навошта было прымушаць пераязджаць сям'ю ў горад. Андрэй нарадзіўся ў вёсцы, усё жыццё працаваў на ферме, трымаў вялікую гаспадарку, дзякуючы якой сям'я кармілася:

«Што, пракорміць ён за 4 мільёны гэтых дзяцей? Смех, ён іх не пракорміць ніяк. А так, вядома, у яго ў вёсцы і гаспадарка была, усё было. А так прымусілі. Іх вось сюды б засяліць, якія прымушалі. Паглядзелі б тады».

Знаёмыя Андрэя, якія прыйшлі дапамагчы разгрузіць мэблю, кажуць, што будуць і далей дапамагаць сям'і.

«Дзеткі маленькія, бедны, знерваваўся...яшчэ забралі... Жонка тым больш скончыла... Яму трэба цярпець зараз, каб настрой быў добры, нечым неяк будзем дапамагаць», - кажуць мясцовыя жыхары.

І мясцовыя жыхары, і сваякі перадавалі падзяку ўсім тым людзям, якія адгукнуліся. Валянціна Накладовіч, сястра Андрэя:

«Я хачу падзякаваць людзям, якія прыйшлі Андрэю, брату майму, на дапамогу. Вялікі дзякуй, нізкі паклон ім. І людзям, якія сёння прыйшлі дапамагчы, жанчынам, якія дапамагалі брату. Вялікі дзякуй».

Муж памерлай Таццяны Андрэй Бовшыс кажа:

«Я хацеў бы падзякаваць тым людзям, якія адгукнуліся ў такой сітуацыі, што мне дапамаглі. Далей тут усё абстаўлю ў кватэры, знайду працу і буду забіраць дзяцей сюды, пераводзіць у Воранаўскага школу. Буду працаваць, дзеля дзяцей, больш у мяне дарагога нічога няма».

«Белсат» прадоўжыць сачыць за лёсам сям'і.