Мілеўскі схлусіў пра вяселле, каб збегчы з Вугоршчыны ў берасцейскае «Дынама»

Футбалісту не спадабаўся вугорскі горад Кішварда.

Форвард Арцём Мілеўскі распавёў, як яму ўдалося збегчы з вугорскай «Кішварды», каб падпісаць кантракт з берасцейскім «Дынама», паведамляе «Прессбол».

«Я прывык жыць у такіх гарадах, у якіх ёсць куды выйсці, ёсць куды схадзіць, да 12 пасядзець і не перажываць, што закрыецца рэстарацыя. Што тычыцца заробкаў і футбольных момантаў, у Вугоршчыне вельмі высокі ўзровень.

Адзінае, што мяне бянтэжыла - горад. Калі ўсё гэта закруцілася, пасля Новага года, напэўна, тыдзень не спаў. Я размаўляў з прэзідэнтам клуба, з Аляксандрам (з агентам гульца Аляксандрам Панковым - заўв.).

Я 25 хвілін размаўляў з прэзідэнтам. Сказаў, што ў мяне вяселле 25 траўня, ужо пачаў «ляпіць». Сказалі: «Няхай нявеста сюды прыязджае». А я: «Сюды ніхто не прыедзе, тут ніхто не ведае ангельскую». Прымайце, як хочаце. Я ведаю, што мяне хочуць вярнуць, і мая галава ў Беларусі. Казаў, што павешуся, а ён на мяне такімі вачыма глядзеў.

Прэзідэнт падумаў, прыйшоў вечарам у гатэль, толькі з Аляксандрам размаўляў. Я сядзеў, чакаў, у мяне ўжо цішотку можна было выціскаць. Потым Саша прыйшоў, сказаў, што ўсё нармальна, можна збіраць рэчы», - распавёў Арцём Мілеўскі ў інтэрв'ю блогу «Бамбардзір».

Арцём Мілеўскі перайшоў у «Кішварду» ў канцы жніўня 2018 года, адыграў у васьмі матчах чэмпіянату Вугоршчыны, правёўшы на полі ў агульнай складанасці 459 хвілін і забіўшы два галы. У студзені форвард вярнуўся ў берасцейскае «Дынама».