У Менску кіроўца «Ягуара» з расейскімі нумарамі кулаком збіў люстэрка чужога аўто
40- 18.02.2019, 16:45
- 34,515
Што стала прычынай такіх паводзін, не зусім зразумела.
Карыстальнік форуму оnliner.by паведаміў, што сёння раніцай стаў відавочцам агрэсіўнага ўчынку з боку кіроўцы Jaguar з расейскімі нумарамі. Мужчына выйшаў з аўтамабіля, падышоў да чужога Nissan і кулаком знёс бакавое люстэрка гэтага аўто. Што стала прычынай такіх паводзін, не зусім зразумела.
- Гэта адбылося сёння раніцай, дзесьці а 10:10 ці 10:15. Неадэкватны кіроўца Jaguar на Лагойскім тракце кулаком знёс люстэрка задняга выгляду Nissan, - распавёў аўтар відэа.
Аўтамабілі стаялі на святлафоры ў раёне перасячэння Лагойскага тракту і вуліцы Валгаградскай. На запісе відаць, як з Jaguar, які знаходзіўся ў крайнім правым шэрагу, выйшаў мужчына. Ён накіраваўся да аўтамабіля Nissan, які стаяў наперадзе, і, як мяркуецца, ударыў па бакавым люстэрку гэтага аўто - відаць, як нешта адляцела.
- Пачатку канфлікту і яго прычыны я не бачыў. Пераглядаў відэа, але таксама нічога асаблівага не заўважыў. Але, спыніўшыся на святлафоры, мужчына з Jaguar выйшаў і некалькі разоў ударыў у акно кіроўцы, які стаяў наперадзе Nissan. А пасля кулаком знёс яму бакавое люстэрка, затым сеў у аўтамабіль і з'ехаў. Што б там ні стала прычынай канфлікту, я ўважаю ўчынак кіроўцы Jaguar за неадэкватны, - адзначыў наш чытач.
Jaguar з'ехаў, а Nissan застаўся стаяць на сваім месцы. Мяркуючы з відэа, бакавое люстэрка гэтага аўто было пашкоджанае.
- Частка яго валялася на дарозе. Астатняе было выгнутае наперад, - распавёў мянчук. - Кіроўцу Jaguar на выгляд блізу 40 гадоў. На аўтамабілі ўсталяваныя расейскія нумары (наколькі здолеў разгледзець, гэта 77-ы рэгіён - Масква. - Заўвага.). Я ехаў за ім да вуліцы Якуба Коласа, адтуль ён павярнуў на вуліцу Някрасава.