«Каштоўнасць жыцця - 10 капеек»

Інвалід памёр пасля збіцця ў чарзе ў менскім супермаркеце.

5 лютага ў менскім супермаркеце адбыўся канфлікт паміж двума пакупнікамі. 39-гадовы мянчук схапіў за каўнер 64-гадовага інваліда, ударыў яго аб сценку, а потым спусціў з прыступак. Пацярпеламу зрабілі некалькі аперацый, але ён памёр у шпіталі, не прыходзячы ў прытомнасць. Нападнік знаходзіцца на волі і, са слоў сям'і загінулага, нават не папрасіў прабачэння.

- Майго мужа забілі ў краме, - зрываючыся на слёзы распавядае tut.by Людміла Русецкая. - Муж у мяне пасля інсульту, правы бок у яго працаваў 50 на 50 - рука нерухомая, нага цягнулася. Ён набываў нешта ў краме, і на стужку ля касы пасыпаліся капейкі. Ведаеце, як пасля інсульту, цяжка справіцца. Можа, абураўся. Пасля інсульту ў яго была парушаная гаворка. Ён гучна размаўляў. Гэта магло раздражняць... Ля іншай касы, стаяў мужчына. Паміж імі пачалася сварка.

Дачка загінулага Юлія дапаўняе:

- Як цяпер кажуць у Малінаўцы, каштоўнасць жыцця - 10 капеек. У таты рассыпаліся манеты на касе, адна манетка трапіла пад стужку. Ён стаў іх збіраць. Папрасіў дастаць 10 капеек у касіркі. Яна адказала: «Як я дастану, тут стужка не разборная». Бацька стаў нервавацца, бо перахварэўшыя на інсульт, як дзеці, вельмі ўспрымальныя да ўсяго.

Сваякі загінулага размаўлялі з відавочцамі, глядзелі матэрыялы відэаназірання.

- На відэа бачна, як тата бубніць пад нос, - кажа Юля. - На суседняй касе пакупнік праз плячо паварочваецца і адказвае штосьці бацьку. Пасля другой рэплікі відаць, што размаўляе ён ужо на эмоцыях, пачынае нервавацца. Далей той мужчына падыходзіць да касы, дзе стаіць тата, адсоўвае пакупніцу перад ім, бярэ бацьку за каўнер, цягне ў тамбур і там шпурляе яго аб сцяну. Потым бярэ за каўнер, адкрывае дзверы на вуліцу і з парога выкідвае яго. Тата ляціць праз прыступкі, падае на спіну, і рука, якая ў яго не працуе, так і застаецца сагнутай. Гэты мужчына сыходзіць. Потым вяртаецца, пераварочвае тату, і да іх падыходзіць ахоўнік. Пачынае тэлефанаваць у «хуткую» і міліцыю. Нападнік у гэтым момант спрабаваў збегчы, але ахоўнік яго дагнаў.

Сваякі спадзяваліся, што ў лякарні бацьку накладуць швы на галаву, і неўзабаве выпусцяць. Яму зрабілі дзве аперацыі, аднак у сябе мужчына ўжо не прыйшоў, памёр 9 лютага.

Вядома, што нападніку 38 гадоў. Ён працуе ахоўнікам у гульнявым клубе ў Малінаўцы.

- Нам сказалі, што ён быў цвярозы, - удакладняе Людміла Фамінічна. - Муж мой наогул не піў, ён - інвалід другой групы.

- Пасля здарэння да нас не звяртаўся ні нападнік, ні ягоныя родныя - ніякіх выбачэнняў, ніякага раскаяння, - кажа дачка загінулага. - Я не разумею, чым бацька так перашкодзіў гэтаму чалавеку. Ну, добра пасварыліся. У краме кожны дзень такое можа адбыцца. Але якое права ты маеш распускаць рукі? На відэа бачна, што ў таты, калі нападнік яго цягне, нерухомы адзін бок, ён не мог даць ніякага адпору!

Са слоў сваякоў, нападнік знаходзіцца на свабодзе.

- Следчы нам сказаў, што пракурор не бачыць падставаў трымаць яго пад вартай, - кажа дачка загінулага.

Распачатая крымінальная справа аб факце наўмыснага прычынення цяжкага цялеснага пашкоджання, што пацягнула па неасцярожнасці смерць чалавека (ч.3 арт.147 КК). Калі віна будзе даведзеная, менчуку пагражае ад 5 да 15 гадоў пазбаўлення волі. Як растлумачылі ў Следчым камітэце, з улікам асобы абвінавачанага да яго ўжытая мера стрымання ў выглядзе падпіскі аб нявыездзе і належных паводзінах.