Cталі вядомыя падрабязнасці смерці ваеннаабавязанага на зборах
31- 15.02.2019, 18:57
- 40,518
Ваеннаабавязаны быў з Берасця.
Падчас збораў памёр ваеннаабавязаны з Берасця, паведамілі БелТА ў прэс-службе Міністэрства абароны.
«Сёння раніцай ваеннаабавязаны 1973 году нараджэння адчуў сябе дрэнна і страціў прытомнасць. Рэанімацыйныя дзеянні выніку не далі. Папярэдняя прычына смерці - вострая сардэчная недастатковасць. Падчас праходжання збораў са скаргамі на самаадчуванне ён не звяртаўся», - паінфармавалі ў вайсковым ведамстве. Міністэрства абароны выказала спачуванні родным памерлага.
«Цяпер ведамства аказвае сям'і ваеннаабавязанага ўсебаковую дапамогу», - адзначылі ў прэс-службе.
Ва Упраўленні Следчага камітэта Берасцейскай вобласці tut.by распавялі, што мужчына 1973 году нараджэння памёр на тэрыторыі аднае з вайсковых частак Баранавічаў.
«Цяпер на месцы здарэння працуе следча-аператыўная група. Баранавіцкім міжраённым аддзелам Следчага камітэта па гэтым факце праводзіцца праверка. Следчым прызначаная судова-медыцынская экспертыза, якая ўсталюе дакладную прычыну гібелі мужчыны», - распавёў афіцыйны прадстаўнік ведамства Дзмітрый Іванюк.