Япрынцаў адсудзіў грошы ў Чыжа

Пастанова суда ўвайшла ў дзеянне.

У чацвер Менскі гарадскі суд пакінуў у дзеянні пастанову суда Цэнтральнага раёна Менска паводле пазову бізнэсоўца Уладзіміра Япрынцава да алігарха Юрыя Чыжа, піша tut.by.

Пазоў на 1960 рублёў задаволены, з улікам дзяржаўнай мыты і кампенсацыі юрыдычных выдаткаў Чыж павінен Япрынцаву 3 208 рублёў. Пастанова суда ўвайшла ў дзеянне.

Нагадаем, у пазове, пададзенай юрыстамі Уладзіміра Япрынцава да былога партнёра Юрыя Чыжа, гаворка ідзе пра грошы за прададзеныя акцыі лагістычнай кампаніі ЗАТ «Аскарготэрмінал». Угода аб продажы дзелі ў кампаніі, якой валодалі Уладзімір Япрынцаў (60%) і Святлана Чыж (40%), жонка Юрыя Чыжа, была ўкладзеная 11 жніўня 2015 года, у дзень затрымання Япрынцава. Грошы на рахунак Япрынцава паступілі некалькімі аплатамі, агулам крыху больш за 100 тысяч даляраў у эквіваленце. У момант залічэння грошай на рахунак ён ужо быў у СІЗА, і, як раней паведамлялася, уся маёмасць і рахункі былі арыштаваныя, але грошы знялі.

Бухгалтарка «Трайпла» Элеанора Леўкіна, якая мела даверанасць на аперацыі з рахункамі і ад Япрынцава, і ад Чыжа, у судзе пацвердзіла, што грошы з рахунку Япрынцава здымала гатоўкай на даручэнне Юрыя Чыжа і перадавала яму - блізу 86 тысяч даляраў і 45 тысяч у жніўні і верасні. Сам уладальнік рахунку ёй такіх загадаў не даваў. Яшчэ тройчы сумы па 40 тысяч даляраў яна пераводзіла на рахунак юрыдычных асоб (раней у судзе агучвалася, што гэта ТАА «Крокус мотарс». - Заўвага.) Для выплаты запазычанасці за аўтамабіль Bentley, набыты Казбекам Япрынцавым.

Адвакатка Япрынцава ў спрэчках звяртала ўвагу на тое, што грошы, заяўленыя ў якасці пазоўных патрабаванняў, - гэта сродкі ад продажу кампаніі «Аскарготэрмінал». «Другі акцыянер кампаніі - Чыж Святлана, пра ўсе дэталі, тэрміны і сумы ўгоды ведаў і Чыж Юрый Аляксандравіч. Праз пару гадзін пасля падпісання дамовы мой давернік быў затрыманы на заяву Чыжа і год правёў у СІЗА. Ужо на наступны дзень грошы з рахунку Уладзіміра Генадзевіча былі знятыя», - нагадала адвакатка. Яна адзначыла, што Япрынцаў не даваў і не мог даваць даручэнні распарадзіцца грашыма так, як гэта зрабіў Чыж. «Адкуль Чыж узяў, што мае права распараджацца грашыма Уладзіміра Генадзевіча і менавіта такім чынам, незразумела. У той момант былі ўзятыя пад варту і Уладзімір, і Казбек Япрынцавы, сям'я засталася фактычна без крыніцы даходу, мой кліент, напэўна, б распарадзіўся грашыма інакш», - аргументавала адвакатка.

З тлумачэнняў Юрыя Чыжа, якія ён даваў падчас правядзення праверкі УУС Партызанскага раёна Менска, сродкі з рахунку Япрынцава-старэйшага ён перадаў крэдыторам сына Япрынцава, расейскім бізнэсоўцам Іосіфу Аксенцьеву і Міхаілу Маміяшвілі.

«Гэтыя сродкі былі перададзеныя ў за запазычанасць паводле дамоўленасці паміж Уладзімірам Япрынцавым, Чыжом, Маміяшвілі і Аксенцьевым. Юрый Аляксандравіч спрабаваў «панізіць градус» і ўрэгуляваць пытанне ціску», - растлумачыў адвакат Чыжа Іван Дудараў. Больш за тое, адзначыў ён, перададзеная сума была большай за знятую - Чыж дадаў і ўласныя сродкі. Пры гэтым пацвердзіць даты і сам факт перадачы грошай Аксенцьеву старана адказчыка не здолела, на што звяртала ўвагу і суддзя.

Пры гэтым адвакат прызнаваў, што дагэтуль дакладна не выяўлена, хто, колькі і каму менавіта вінен. Сума вагаецца ад 15 да 33 млн даляраў. Падчас следства і Чыж, і Уладзімір Япрынцаў пацвярджалі, што асноўныя абавязкі кампаніі Казбека Япрынцава і партнёраў - акурат Маміяшвілі і Аксенцьеву. Пацвярджае гэта той факт, што менавіта на іх была перааформленая дзель Япрынцава-старэйшага ў «Трайпл». Аднак пацярпелым у крымінальным працэсе стаў Юрый Савяк, праз кампанію якога грошы прыйшлі на кампанію Япрынцава-малодшага.

Адвакатка Япрынцава звярнула ўвагу на тое, што «калі ў гэтым працэсе даказаны будуць абавязанні перад Маміяшвіліі Аксенцьевым, то трэба вяртацца да перагляду крымінальнай справы, дзе яны былі не пацярпелымі, а сведкамі, і нават ні разу не з’явіліся ў суд». Яна падкрэслівала, што ніякіх абавязанняў Уладзіміра Япрынцава перад Маміяшвілі і Аксенцьевым не існуе, і пярэчыла супраць іх прыцягнення ў якім-небудзь статусе ў працэс.

Заяўленая сума пазову - усяго 1 960 рублёў. Відавочна, што гэты пазоў - не апошні, бо ў Уладзіміра Япрынцава была дзель у многіх буйных праектах з Чыжом і звязанымі з ім асобамі. Толькі ягоная дзель у «Трайпл», якая дасталася Аксенцьеву і Маміяшвілі, паводле ацэнак экспэртаў, перавышала суму пазыкі і складала блізу 50 млн даляраў. Пазоў Япрынцава да Аксенцьева аб прызнанні несапраўднай дамовы куплі-продажу ягонай дзелі ў «Трайпл», укладзенай у 2015 годзе, цяпер разглядаецца ў судзе.