З Венесуэлы ў Балгарыю пералічаныя шматмільённыя сумы

Улады Балгарыі падазраюць, што гаворка ідзе пра адмыванне грошай.

З Венесуэлы ў Балгарыю пералічаныя шматмільённыя сумы. Інфармацыя пра гэта паступіла ад ЗША, паведаміў у сераду, 13 лютага, у Сафіі кіраўнік балгарскай службы нацыянальнай бяспекі ДАНС Дзімітар Георгіяў пасля сустрэчы з прэм'ер-міністрам краіны Бойка Барысавым і амбасадарам ЗША ў Сафіі Эрыкам Рубіным, паведамляе DW.

Са слоў галоўнага пракурора Балгарыі Саціра Цацарова, які таксама ўдзельнічаў у гэтай сустрэчы, частка грошай была пералічаная дзяржаўнай нафтавай кампаніяй Венесуэлы. Грошы паступілі на траставы рахунак у адным з балгарскіх банкаў. Яго назва не абвяшчаецца. Улады Балгарыі падазраюць, што гаворка ідзе пра адмыванне грошай. Цяпер усе банкі Балгарыі правяраюцца на прадмет атрымання буйных сум грошай з Венесуэлы.

Уладальнікам траставага рахунку, са слоў Цацарова, з'яўляецца балгарскі адвакат, які мае грамадзянства адразу некалькіх краін. Частка грошай з гэтага рахунку была пералічаная на розныя рахункі ў іншых дзяржавах. Пры гэтым пералічэнні ажыццяўляліся як мяркуецца з фіктыўнымі мэтамі, такімі як фінансаванне венесуэльскай спартыўнай федэрацыі або закупка прадуктаў харчавання для Венесуэлы.