Кіраўніка Херсонскай вобласці Украіны западозрылі ў арганізацыі забойства Гандзюк

Аб падазрэнні абвясціла Генеральная пракуратура.

Кіраўніку Херсонскай абласной рады Уладзіславу Мангеру абвясцілі аб падазрэнні ў арганізацыі забойства супрацоўніцы мэрыі Херсона Кацярыны Гандзюк, паведаміў 11 лютага ў Facebook генеральны пракурор Украіны Юры Луцэнка, піша gordonua.com.

Згодна з апублікаваным кіраўніком ГПУ тэкстам дакумента, Мангера падазраюць "у арганізацыі забойства, гэта значыць, наўмыснага супрацьпраўнага прычынення смерці іншаму чалавеку, учыненага з карыслівых матываў, на замову, з асаблівай жорсткасцю, паводле папярэдняй змовы групай асоб, гэта значыць, ва ўчыненні злачынства, прадугледжанага ч. 3 арт. 27, п. 4, п. 6, п. 11, п. 12 ч. 2 арт. 115 КК Украіны".

31 ліпеня 2018 года Гандзюк аблілі сернай кіслатой ў Херсоне. 4 лістапада яна памерла ў адной з кіеўскіх лякарняў.

У жніўні былі арыштаваныя меркаваны арганізатар нападу Сяргей Торбін, Уладзімір Васяновіч, Вячаслаў Вішнеўскі, Віктар Гарбуноў і Мікіта Грабчук, які, паводле версіі следства, абліў актывістку кіслатой. Яны з'яўляюцца ўдзельнікамі баявых дзеянняў на ўсходзе Украіны ў складзе добраахвотніцкага фармавання.

Васяновіча, Вішнеўскага і Гарбунова пасля адпусцілі пад хатні арышт.

У лістападзе арыштавалі памочніка народнага дэпутата ад Блока Пятра Парашэнкі Мікалая Паламарчука, Ігара Паўлоўскага. Яго падазраюць у перадачы грошай Торбіну.

У снежні генеральны пракурор Украіны Юры Луцэнка назваў крымінальнага аўтарытэта Аляксея Левіна ключавым фігурантам справы. Са слоў кіраўніка ГПУ, бізнэсовец, які адсядзеў у турме за дачыненне да нападаў і забойстваў таксістаў у Херсоне, выехаў з краіны ў дзень, калі паліцыя правяла першыя арышты паводле справы Гандзюк. Са звестак народнага дэпутата Мустафы Наема, Левін знаходзіцца ў Дамініканскай Рэспубліцы. Ва Украіне яго абвясцілі ў вышук.

28 студзеня 2019 года на пасяджэнні часовай следчай камісіі Вярхоўнай Рады ў расследаванні забойства актывісткі ейны бацька Віктар Гандзюк заявіў, што меркаваны арганізатар нападу на ягоную дачку Левін супрацоўнічаў з Мангерам, а таксама з кіраўніком Херсонскай абласной дзяржаўнай адміністрацыі, экс-нардэпам ад Блока Пятра Парашэнкі Андрэем Гардзеевым і ягоным намеснікам Яўгенам Рышчуком.

У той жа дзень Гардзееў заявіў, што ягонае імя і пасаду, а таксама гора бацькоў "выкарыстоўваюць у палітычных маніпуляцыях", а Рышчук сказаў, што ніколі не быў знаёмы з Левіным.

9 лютага бюро Херсонскай абласной арганізацыі партыі "Бацькаўшчына" пастанавіла выключыць Мангера з палітычнай сілы.