«Дачка» «Газпрама» назвала суму спісаных Чачэніі пазык

Раней у кампаніі гэты факт адмаўлялі.

У даччынай кампаніі «Газпрама» паведамілі, што сума пратэрмінаванай жыхарамі Чачэніі запазычанасці за газ у судовай пастанове ўсё ж называлася. Як паведаміў РБК прадстаўнік «Газпрам Межрэгіёнгаза», гаворка ішла пра завінавачанасць на 9,353 млрд руб., што назапасілася за перыяд з 1 студзеня 2007 да 30 верасня 2015 года, паведамляе РБК.

Такім чынам у кампаніі пракаментавалі заяву кампаніі «Газпрам Межрэгіёнгаз Грозны», чый топ-мэнэджар Рустам Амерханаў сказаў агенцтву ТАСС аб адсутнасці сумы запазычанасці ў дакуменце. У «Газпрам Межрэгіёнгаз» паказалі, што хоць лічбы няма ў рэзалютыўнай частцы пастановы, яна прысутнічае ў матывавальнай.

Сам Амерханаў абвешчаную суму на 9 млрд рублёў раней называў «інфармацыйным укідам».

Сума на 9 млрд руб. першапачаткова згадвалася ў паведамленні пракуратуры Чачэніі, што была апублікаваная 16 студзеня. Пазней яна з паведамлення знікла, аднак на сэрвісе Internet Archive захаваўся стары варыянт паведамлення з загалоўкам «Паводле пазову пракурора суд абавязаў адказчыка спісаць безнадзейную ў спагнанні запазычанасць насельніцтва за газ на суму больш за 9 млрд рублёў».

Сваю пазіцыю пракуратура першапачаткова тлумачыла тым, што патрабаванне плаціць за завінавачанасць за газ «стварала сацыяльную напружанасць і магло пацягнуць пратэстныя выступы». У сваю чаргу міністр нацыянальнай палітыкі Чачэніі Джамбулат Умяроў патлумачыў пастанову суда «спецыфікай рэгіёну» і тым, што «запазычанасць утварылася падчас баявых дзеянняў».

Пастанова грозненскага суда выклікала вялікі грамадскі рэзананс. З заклікамі спісаць паводле той жа схемы завінавачанасць жыхароў іншых суб'ектаў Расеі выступілі дэпутаты рэгіянальных парламентаў Чувашыі, Пензенскай і Смаленскай абласцей, Ханты-Мансійскай аўтаномнай акругі і гэтак далей.

Супраць спісання завінавачанасці выступіў напярэдадні кіраўнік Мінбуду Уладзімір Якушаў. Журналістам ён заявіў, што не падтрымлівае гэтую ініцыятыву, патлумачыўшы гэта дысцыплінай і рознымі праблемамі, для якіх трэба шукаць грашовыя сродкі, паведамляла агенцтва ТАСС.

Прэс-сакратар прэзідэнта Расеі Дзмітрый Пяскоў у сваю чаргу заявіў, што «у Крамля якой-небудзь пазіцыі няма», аднак пры гэтым паказаў, што паколькі тавар канчатковаму спажыўцу быў дастаўлены, Газпрам на грошы разлічвае.