Магілёўцы запатрабавалі ад уладаў цалкам спыніць завод «Омск Карбон»

Жыхары горада патрабуюць перанесці прадпрыемства ў іншае месца.

Магілёўцы не вераць уладам, запэўніваюць, што на прадпрыемстве «Омск Карбон Магілёў» усё добра з экалагічнай бяспекай, і будзе яшчэ лепш, піша mogilev.online.

На сайце petitions.by яны стварылі петыцыю, у якой патрабуюць ад уладаў цалкам спыніць завод і перанесці яго ў іншае месца ў сувязі са шматлікімі парушэннямі экалагічных нормаў, адно з якіх - непапраўнае. Вось што гаворыцца ў петыцыі:

«Мы жыхары Магілёва і Магілёўскага раёна выказваем нязгоду з дзеяннямі службовых асоб, на наш погляд, вінаватых у забруджванні прыроды хімічнымі рэактывамі.

18 снежня 2016 года падчас грамадскага абмеркавання справаздачы аб АУНА ЗТАА «Омск Карбон Магілёў» жыхарам Магілёўскага раёна і г.Магілёва паведамілі, на нашу думку, неадпаведныя рэчаіснасці звесткі:

Аб будаўніцтве станцыі сталага кантролю за выкідамі забруджаных рэчываў і размяшчэння вынікаў у сетцы Інтэрнэт.

Аб пасадцы зялёных насаджэнняў хуткарослых дрэў устойлівых да шкодных выкідах забруджаных рэчываў.

Старшыня Магілёўскага райвыканкама Дуцько А.І. «гарантаваў забяспечыць кантроль за рэалізацыяй праектных развязанняў і поўнай адпаведнасцю праектнай дакументацыі, якая прайшла, у тым ліку і дзяржаўную экалагічную экспэртызу».

Цяпер няма кантролю за выкідамі шкодных хімічных рэчываў, пасаджаныя дрэвы не прыжыліся. У 2018 годзе забароненае купанне ў сажалцы д.Вільчыцы Магілёўскага раёна праз забруджванне хімічнымі рэактывамі, а 16 лістапада 2018 года вёскі ў ваколіцах ЗТАА «Омск Карбон Магілёў» накрыла воблакам чорнай сажы.

Толькі за 18 лістапада 2018 года Магілёўскім абласным камітэтам прыродных рэсурсаў і аховы навакольнага асяроддзя пасля шматлікіх зваротаў грамадзян, была накіраваная група спецыялістаў для абследавання крыніц выкідаў ЗТАА «Омск Карбон Магілёў», якая ўстанавіла перавышэнне ўзроўню забруджванняў (факт-690,17 мг/м3, нарматыў - 17,01мг/м3). Кіруючыся арт.11 і 17 Закона Рэспублікі Беларусь «Аб Савеце Міністраў Рэспублікі Беларусь» і арт.46 Канстытуцыі Рэспублікі Беларусь просім:

1. Абвясціць тэрыторыі, якія прымыкаюць да ЗТАА «Омск Карбон Магілёў», зонамі экалагічнай рызыкі, экалагічнага крызісу і забяспечыць эфектыўны кантроль за працай прадпрыемстваў, якія забруджваюць прыроду хімічнымі адкідамі.

2. Улічваючы, што завод «Омск Карбон» пабудаваны са шматлікімі парушэннямі, адно з якіх непапраўнае (адлегласць да жылых дамоў 873 м пры норме 1000 м), ужыць захады для канчатковага прыпынення работ на заводзе, і яго пераносу ў іншае месца» .

Падпісаць петыцыю можна тут.