Суд паводле справы аб хабарах у Мінлясгасе: 15 абвінавачаных, двое з іх у клетцы

У Менску пачаўся новы гучны судовы працэс аб карупцыі.

У гэты чацвер, 17 студзеня, у судзе Цэнтральнага раёна Менска пачаўся разгляд крымінальнай справы ў дачыненні да 15 абвінавачаных у сістэме Міністэрства лясной гаспадаркі. Двое мужчын знаходзяцца ў клетцы: Корзун - былы гендырэктар прадпрыемства «Плешчаніцлес», і Хадасок, які да затрымання працаваў у Уздзенскім лясгасе галоўным інжынерам (пад вартай ён з канца студзеня мінулага года), піша kp.by.

Астатнія абвінавачаныя сядзяць на першых лаўках.

Нагадаем, вясной мінулага года кіраўнік КДБ Валерый Вакульчык распавёў пра справу аб карупцыі ў сістэме Мінлясгаса, у тым ліку пра тое, што крымінальныя справы былі распачатыя ў дачыненні да службовых асоб, звязаных з карупцыяй. Паводле ягоных слоў, за мяжу пад выглядам і коштам дроў адпраўлялася добрая, апрацаваная драўніна. Вакульчык таксама распавёў, каго менавіта затрымалі:

- Камерсанты раней займалі пасады ў міністэрстве, потым заняліся бізнэсам і працавалі наўпрост з лясгасамі, развозілі хабары службовым асобам.

Мужчынам выставілі абвінавачванне паводле такіх артыкулаў, як «Ухіленне ад выплаты сум падаткаў, збораў», «Дача хабару» і «Атрыманне хабару».

У пачатку судовага пасяджэння абвінавачаныя назвалі свае прозвішчы і месца сваёй працы. Цікава, што многія працуюць у лясгасах. Так, абвінавачаны Міхаіл Грыгаровіч працуе ў лясгасе інжынерам-радыёлагам. Яшчэ адзін абвінавачаны, Уладзімір Міцько, працуе інжынерам-энергетыкам у Бабруйскім лясгасе. Сярод абвінавачаных ёсць таксама пенсіянер, беспрацоўны, падсобны рабочы, індывідуальныя прадпрымальнікі. Многія з вышэйшай адукацыяй.

Дзяржабвінаваўца не паспеў зачытаць абвінавачанне да перапынку на абед.

Судовае слуханне доўжыца.