Камуналка-2019: «Дармаедскі» тарыф увядуць для ўсіх
62- 14.01.2019, 10:20
- 98,318
Колькі напраўду будуць плаціць за ЖКГ беларусы?
Ужо ў гэтым месяцы заплацім больш за камунальныя паслугі. Тарыфы значна выраслі, але яшчэ больш павялічыліся кошты для грамадзян, не занятых у эканоміцы, паведамляе «Белсат».
Чаму беспрацоўныя ўласнікі кватэр мусяць заплаціць больш, а таксама наколькі розніцца студзеньскі рахунак дармаеда ад камунальнага плацяжу «звычайнай сям‘і»?
Вада, газ, электрычнасць, каналізацыя, капітальны рамонт, вываз смецця – усё даражэе. Але некаторыя мацней адчуюць рост коштаў. Тыя, хто не заняты ў эканоміцы, заплоцяць за камунальныя паслугі болей. Гэтак пастанавілі ўлады.
Каментуе журналіст Аляксандра Квіткевіч:
«Гэта зрабілі для таго, каб прастымуляваць не занятых у эканоміцы ўладкавацца на працу, плаціць падаткі дзяржаве. Я не думаю, што гэта вельмі эфектыўны захад, бо, па-першае, уласнікаў жылля і дармаедаў – іх вельмі мала».
Уласнікі жылля, якія трапілі ў дармаедскі спіс, са студзеня аплачваюць квітанцыі паводле поўных тарыфаў.
Жыхары Пінску кажуць:
«Я не вельмі добра да гэтага стаўлюся, у мяне таксама сын не працуе – не можа ўладкавацца пасля заканчэння ўніверсітэту».
«Калі людзі не працуюць – дайце ім працу. Калі ёсць праца – ёсць за што плаціць».
«А дзе яны возьмуць такія грошы? Я думаю, што людзі былі ўвесь час падзеленыя на багатых і бедных».
«Не было ў людзей грошай – увогуле не будзе ніколькі. Застаецца толькі ўсміхацца».
Як сітуацыя выглядае ў лічбах?
Агулам, як падлічылі журналісты, кошт камунальных плацяжоў для сям‘і з трох чалавек у двухпакаёўцы павялічыцца больш як на 30 рублёў, калі ўласнік кватэры – дармаед. І ажно на 53 рублі, калі беспрацоўны жыве адзін.
Такім чынам рахунак у не занятага ў эканоміцы будзе амаль на 21 рубель цяжэйшы, чым калі б ён жыў з сям‘ёю. Пры гэтым не-дармаедам улада субсідуе ўжо толькі газазабеспячэнне і ацяпленне.
Каментуе Аляксандра Квіткевіч:
«Дармаед павінен плаціць паводле 100-адсоткавых тарыфаў толькі за сябе, а чальцы ягонае сям’і – гэтак, як і ўсе. Тым больш што праз некаторы час тарыфы падаражэюць для ўсіх. Мы ўсе будзем плаціць паводле 100-адсоткавых тарыфаў за ацяпленне і за ўсё».
Беларусы каментуюць сітуацыю:
«У краіне няма грошай, краіна жыве толькі на штрафах. Штраф за ўсё».
«Бюджэту ўжо вечка, трэба любымі сродкамі, як кажуць, грошы з народу садраць».
Тарыфы на камунальныя паслугі з новага года выраслі па ўсёй Беларусі. З пачатку чэрвеня вырасце і кошт на ацяпленне.