The Insider: Падазраваным у атручванні Скрыпалёў выявіўся палкоўнік ГРУ Анатоль Чапіга

Расследавальнікі даведаліся сапраўднае імя падазраванага ў атручванні Скрыпалей.

Падазраваныя ў атручванні экс-выведніка Сяргея Скрыпаля і яго дачкі Юліі Руслан Башыраў апынуўся палкоўнікам Галоўнага разведвальнага ўпраўлення (ГРУ) Анатолем Чапіга, вынікае з расследавання Bellingcat і The Insider, піша «Новая газета».

Паводле інфармацыі выдання, Анатоль Чапіга нарадзіўся ў 1979 годзе ў вёсцы Мікалаеўка на кітайска-расейскай мяжы. Ён скончыў Далёкаўсходнюю вышэйшую агульнавайсковую камандную вучэльню (ДВАКВ), якая ў тым ліку рыхтавала афіцэраў спецназа ГРУ.

Пасля вучобы Чапіга пайшоў на службу ў 14-ю брыгаду спецназа ГРУ ў падраздзяленне 74854 (раней 20662). У снежні 2014 года, даведаўся The Insider, яму прысвоілі званне «Героя Расеі» за «выкананне міратворчай місіі». Пад гэтым, па здагадцы журналістаў, маюцца на ўвазе вайсковыя дзеянні на Украіне.

The Insider і Bellingcat ідэнтыфікавалі асобу Чапіга, прагледзеўшы фатаграфіі выпускнікоў ДВАКВ за 2001-2003 гады. На адной з іх, з Чачні, атрымалася выявіць чалавека, аддалена падобнага на падазраванага. Пазней журналісты выявілі імя Чапіга ў адной з баз звестак, у якой адрас яго пражывання ў Хабараўску супаў з адрасам вайсковай часці 14-й брыгады спецназа ГРУ. Пасля The Insider апублікаваў скрыншот выпіскі з сістэмы «Расейскі пашпарт» за 2014 год, на якой бачны фотаздымак Чапіга.

Раней The Insider і Bellingcat апублікавалі другую частку расследавання, у якой гаварылася, што замежныя пашпарты Пятрова і Башырава блізкія па нумарах да дакументаў супрацоўнікаў ГРУ. У першай частцы расследавання сцвярджалася, што Башыраў і Пятроў з'яўляюцца супрацоўнікамі расейскіх спецслужбаў. Следчыя спасылаліся на базу ФМС, згодна з якой звесткі аб атрыманні Пятровым як расейскіх, так і замежных пашпартоў да 2009 года няма.

Самі Башыраў і Пятроў адмаўляюць дачыненне да расейскіх спецслужбаў. У інтэрв'ю Russia Today яны заявілі, што прыязджалі ў Солсберы, каб паглядзець мясцовыя славутасці. Тым не менш, яны не выключаюць, што ў той дзень маглі праходзіць міма дома Скрыпалей. МЗС Вялікабрытаніі назваў гэтае інтэрв'ю «хлуснёй і заблытваннем пытання».

Былога палкоўніка ГРУ Сяргея Скрыпаля і ягоную дачку Юлію знайшлі беспрытомным каля рэстарацыі ў Солсберы 4 сакавіка. Вялікабрытанія заявіла, што расейцы былі атручаны нервова-паралітычным рэчывам «Навічок», распрацаваным у СССР, і абвінаваціла ў атацы Расею. Расея ўсе абвінавачванні адмаўляе, спасылаючыся на адсутнасць доказаў. Інцыдэнт у Солсберы выклікаў вялікі дыпламатычны скандал: заходнія краіны выслалі больш за 150 расейскіх дыпламатаў, а Расея адказала люстранымі мерамі.