«Гэта адна з самых маштабных фінансавых пірамід»
3- 26.09.2018, 19:28
- 16,683
Расейскі Цэнтрабанк усумніўся ў інвестплатформе, «зародкі» якой ёсць і ў Беларусі.
Цэнтрабанк Расейскай Федэрацыі накіраваў у Генпракуратуру і МУС інфармацыю аб дзейнасці групы кампаній «Кэшберы», убачыўшы ў ёй прыкметы фінансавай піраміды, піша onliner.by.
«Кэшберы» пазіцыянуе сябе як крэдытная і інвестыцыйная платформа, прапаноўваючы інвестарам прыбытковасць да 550% гадавых. Група кампаній прыцягвае грошы ў рублях і крыптавалюце, але пры гэтым, паводле звестак Цэнтрабанка, не вядзе рэальнай эканамічнай дзейнасці.
Паводле інфармацыі рэгулятара, «Кэшберы» ўдалося ўцягнуць у сваю дзейнасць некалькі дзясяткаў тысяч чалавек. «Гэта адна з самых маштабных фінансавых пірамід, якую мы выявілі за апошнія гады, яна разгарнула сваю дзейнасць у многіх рэгіёнах, практычна ва ўсёй краіне. Мы ўважаем за неабходнае папярэдзіць грамадзянаў пра рызыкі, звязаныя з укладаннем грошай у гэты «праект», каб паменшыць іх магчымую шкоду», - цытуе словы дырэктара дэпартамента процідзеяння нядобрасумленным практыкам ЦБ Валерыя Ляха выданне «Медуза».
За паўтара года існавання «Кэшберы» паспеў адзначыцца і на прасторах нашай радзімы - у адной з сацсетак ёсць нешматлікая «профільная» група. Патэнцыйных інвестараў прыцягваюць дзіўнымі магчымасцямі: «Калі ў вас мала вольнага часу - проста адкрыйце дэпазіт і атрымлівайце кожны дзень налiчэнні! Калі ў вас актыўная пазіцыя і ёсць вольны час - дзяліцеся інфармацыяй аб кампаніі і атрымлівайце шыкоўныя ўзнагароджанні ў дадатак да пасіўных налічэнняў! Калі вы жадаеце развівацца - наведвайце бізнэс-форумы кампаніі! «Кэшберы» - гэта вельмі моцная інвестыцыйная кампанія, якая дакладна прывядзе вас да дасягнення мэты! Далучайцеся да моцнай, паспяховай кампаніі!»
Нядаўна босы кампаніі праводзілі акцыю: «тром новым інвестарам, якія зрабілі ўнёсак паводле тарыфу «Прэм'ер» пойдзе бонусам сертыфікат..на 1000 тысячу рублёў вам на рахунак у кабінет для стварэння Інвестыцыі на тарыф «Лакшэры» пад 0,8% на дзень! А гэта 8 рублёў на дзень, 56 на тыдзень, 240 на месяц!!! Усе інвестыцыі працуюць 400 дзён! Паспейце атрымаць свой падарунак!» (Арфаграфія і пунктуацыя аўтара захаваныя).
Характэрна, што 15 жніўня на YouTube быў размешчаны ролік ад асобы лідара кампаніі Артура Варданяна, які тлумачыў, «каму выгадна паліваць «Кэшберы» брудам». А ўжо сёння за арганізацыю ўзяліся не толькі «тролі і нядобразычліўцы», але і дзяржорганы.
У Беларусі «Кэшберы» не паспеў моцна раскруціцца: на навіны супольнасці падпісаныя ўсяго 526 чалавек, у асноўным - маладыя ды раннія.