Леанід Судаленка: Чым больш працоўны прагінаецца перад начальнікам, тым больш яго будуць нахіляць

Прававы інспектар распавёў, як пазбегнуць «камандзіровак на бульбу».

Аб такой шматгадовай традыцыі, якая існуе з савецкіх часоў да сёння, распавёў у інтэрв'ю Onliner.by працаўнік адной з арганізацый горада Горак.

Горацкі райвыканкам разаслаў у арганізацыі загады, у якіх патрабуе «забяспечыць адпраўку людзей» для надання шэфскай дапамогі ААТ «Горацкае». У адпаведнасці з дакументам кожны дзень з 10 да 29 верасня на прыборку ўраджаю павінны выходзіць па 100 чалавек.

Работнік абавязаны выконваць толькі тую працу, на якую ён пагадзіўся і якая прапісаная ў працоўнай дамове, тлумачыць у экспрэс-каментары «Салідарнасці» прававы інспектар прафзвязу радыёэлектроннай прамысловасці Леанід Судаленка.

Экспэрт падкрэслівае, што гэта тычыцца работніка наёмнай працы, працоўнае пагадненне з усякім наймальнікам, па-за залежнасцю ад формы ўласнасці - дзяржаўная, прыватная, акцыянерная, з замежным капіталам.

- Больш за тое, у Працоўным кодэксе ўтрымліваецца норма, якая забараняе працадаўцу патрабаваць ад работніка выканання працы, не абумоўленай працоўнай дамовай, - адзначае Леанід Судаленка. - Напрыклад, вы працуеце фрэзероўшчыкам на «Гомсельмашы», і вам начальнік кажа, што заўтра а 8 раніцы ад прахадной на поле адпраўляецца аўтобус: «абувай кірзавыя боты, набывай пальчаткі, апраніся цяплей, паедзем у калгас капаць бульбу». Вы можаце пагадзіцца, гэта ваша права. Але вы маеце права адмовіць наймальніку, спаслаўшыся на тое, што не ўкладалі з ім пагаднення ездзіць на сельгаспрадпрыемствы і збіраць ураджай.

Часта для працоўных важная добразычлівасць свайго шэфа, ён размяркоўвае прэміі і розныя матэрыяльныя даброты, кажа спадар Судаленка.

- Я глыбока перакананы: чым больш працоўны прагінаецца перад начальнікам, тым больш яго будуць нагінаць. Нагнуць неўзабаве так, што ён не разагне спіны і будзе ўсё жыццё да пенсіі працаваць у такім становішчы, прагінаючыся перад начальнікам.

Некаторыя кажуць, што ім падабаецца ездзіць у калгас і працаваць на свежым паветры. Але не дай Бог, з табой адбудзецца няшчасны выпадак, пашкодзіш палец ці нешта ўпадзе на галаву, у мяне вялікія сумневы, што гэты факт аформяць як траўму, атрыманую на вытворчасці.

Леанід Судаленка прыгадвае маладзечанскую трагедыю 2015 года, калі на ўборцы бульбы загінула школьніца.

- Пасля той гісторыі не толькі школьнікаў, але і студэнтаў пакінулі ў спакоі і больш не адпраўляюць на ўборку ўраджаю.

Юрыст тлумачыць і іншыя правы работніка: калі вас адпраўляюць на адлегласць звыш 30 км ад горада, можаце патрабаваць ад наймальніка афармлення камандзіроўкі. Акрамя таго, ён павінен забяспечыць работніка спецвопраткай. Выезд на поле ў выходныя дні аплачваецца як праца з двайной аплатай.

- Трэба патрабаваць ад наймальніка, каб паездка на ўборку ўраджаю афармлялася як камандзіроўка. Калі адбудзецца няшчасны выпадак, ён будзе зарэгістраваны як вытворчая траўма.

Экспэрт нагадвае, як пасля гібелі школьніцы ў Маладзечанскім раёне, юрысты спрабавалі праз суд прызнаць факт працоўных дачыненняў.

- Мінадукацыі заняло пазіцыю: школьніца не працавала, гэта быў выхаваўчы працэс працай.

Леанід Судаленка прапануе бясплатную юрыдычную дапамогу работнікам:

- Калі вас пазбавілі прэміі або звольнілі за адмову паехаць на сельгасработы, звяртайцеся. Я гатовы ўзяцца за гэты кейс, каб паказаць абсурднасць сітуацыі.

Прававы інспектар упэўнены: самым важным з'яўляюцца чалавек і ягонае здароўе. Ён прыводзіць прыклад, як у снежні мінулага года перад прыездам Лукашэнкі ў Буда-Кашалёўскі раён выратавальнік сарваўся з даху кароўніка і разбіўся да смерці.

- Ён чысціў дах кароўніка. Баяліся, што Лукашэнка з гелікаптэра ўбачыць брудны дах. Наймальнік заявіў, што ўсё адбылося на віну работніка. Пра тое, што наймальнік запатрабаваў выканаць працу, не абумоўленую працоўнай дамовай, усе замаўчалі, у тым ліку і Следчы камітэт, які адмовіў у распачынанні крымінальнай справы.

Памятайце, што жыццё і здароўе - гэта галоўнае. Калі на калгасным полі нешта адбудзецца, усе потым адхіснуцца.