ІП з Воршы перамог у судзе ў чыноўнікаў

Прадпрымальнік перамог у конкурсе на пасажырскія перавозкі, але нечакана быў адхілены ад дзейнасці.

Конкурс на пасажырскія перавозкі ў Воршы праходзіў 14 красавіка і быў арганізаваны Віцебскім абласным камунальным транспартным унітарным прадпрыемствам «Аператар перавозак». Прадпрымальнік падаў заяўку на адзін з маршрутаў і па выніках конкурсу быў прызнаны пераможцам, паведамляе orsha.eu.

Аднак 23 красавіка пры афармленні пратаколу вынікаў праведзенага конкурсу, простай большасцю галасоў чальцамі камісіі была прынятая пастанова аб нядопуску конкурснай прапановы гэтага ІП да ўдзелу ў конкурсе. Ён не падаў копію даведкі аб валоданні або карыстанні аўтобусам, што ў ВАКТУП палічылі падставай для перадачы маршруту іншым бізнэсоўцам - прыватнаму транспартнаму ўнітарнаму прадпрыемству «Э».

У судовым пасяджэнні, якое адбылося 15 жніўня, ВАКТУП «Аператар перавозак» паказаў, што прадстаўляе сябе як неналежнага адказчыка, у задавальненні пазоўных патрабаванняў прасіў адмовіць, паколькі парушэнняў, якіх дастаткова для адмены праведзенага конкурсу, няма. Яго падтрымаў прадстаўнік Аршанскага раённага выканаўчага камітэта, які заявіў, што парушэнняў пры правядзенні конкурсу не было, паведамляе ННВ.

Аднак суд, з улікам довадаў, якія ёсць у матэрыялах справы, прыйшоў да высновы, што адказчыкам пры правядзенні конкурсу былі дапушчаныя істотныя парушэнні, якія паўплывалі на вынікі конкурсу. Паводле пастановы Эканамічнага суда Віцебскай вобласці вынікі таргоў - конкурсу на права выканання аўтамабільных перавозак пасажыраў у рэгулярных злучэннях прызнаныя несапраўднымі. ВАКТУП «Аператар перавозак» абавязалі выплаціць на карысць прадпрымальніка 245 рублёў на кампенсацыю выдаткаў аплаты дзяржаўнай мыты.

Паводле заявы адказчыка пададзеная ім апеляцыйная скарга пакінутая без разгляду, паведамляе прэс-служба эканамічнага суда Віцебскай вобласці. Пастанова суда першай інстанцыі 19 верасня ўвайшла ў законнае дзеянне.