Запасы валюты ў расейскіх банках упалі да гістарычнага мінімуму

«Валютная падушка» РФ сціснулася да крытычнай адзнакі.

Дэфіцыт валюты ў расейскай банкаўскай сістэме працягвае абвастрацца на фоне адтоку капіталу і вываду сродкаў як карпарацыямі, так і насельніцтвам, піша finanz.ru.

Да верасня запасы свабоднай валюты ў расейскіх банках упалі да гістарычнага мінімуму. Аб'ём кароткатэрміновых высокаліквідных валютных актываў, якія выкарыстаны для кампенсацыі абавязанняў перад кліентамі, сціснуліся да 85 млрд даляраў, падлічылі аналітыкі ITI Capital.

Гаворка ідзе пра гатовую валюту, альбо актывы, якія могуць быць хутка канвертаваныя ў гатовыя сродкі пры неабходнасці.

Гэта 14 млрд даляраў касавай гатоўкі, 16,3 млрд даляраў у выглядзе сродкаў на замежныя карэспандэнцкія рахункі, 10 млрд даляраў, прыцягнутых у выглядзе кароткатэрміновых крэдытаў за мяжой, і яшчэ 45 млрд даляраў у еўрааблігацыях з кароткай дзюрацыяй і тэрмінам абарачэння да 12 месяцаў.

З красавіка «валютная падушка» банкаўскай сістэмы сціснулася на 10 млрд даляраў, а астатнія сродкі ледзь пакрываюць усе ўклады насельніцтва (87 млрд даляраў).

Самі ўклады, тым часам, імкліва выцякаюць: з красавіка фізічныя асобы забралі з рахункаў да 5 млрд даляраў. Яшчэ 13 млрд даляраў вывелі юрыдычныя асобы.

Галоўнай «ахвярай» валютных уцёкаў стаў Ашчадбанк, які страціў 3,5 млрд даляраў. З іх 2,3 млрд давялося вярнуць карпарацыям, а рэшту забрала насельніцтва.

«Адток мог быць звязаны з асцярогамі, што амерыканскія ўлады ўвядуць для расейскіх дзяржбанкаў абмежаванні на аперацыі ў далярах ЗША», - кажа галоўны інвестыцыйны стратэг ITI Capital Іскандэр Луцко.

Валюту выводзяць нерэзідэнты, якія бягуць з рынку расейскай дзяржаўнай завінавачанасці: за красавік-жнівень яны прадалі аблігацый федэральнай пазыкі на 6 млрд даляраў, а ў верасні - яшчэ на 1 млрд, ацэньвае Луцко.

Яшчэ 27 млрд даляраў выцякалі на выплату замежнай запазычанасці. Нарэшце, у пачатку верасня 7,4 млрд еўра вывеў з Расеі банк ВТБ: грошы сышлі ў выглядзе крэдыту катарскаму фонду QIA на куплю дзяржпакету «Раснафты», ад якога адмовіўся кітайскі інвестар у асобе кангламерату CEFC. «Гэта азначае яшчэ большы дэфіцыт валюты да канца верасня», - папярэджвае Луцко.

Аб'ём даступных банкам сродкаў «дазваляе кампенсаваць абавязанні перад фізічнымі асобамі ў валюце на 97%, калі не будзе панікі і кліенты не будуць масава выводзіць валюту з банкаўскай сістэмы», дадае ён: у гэтым выпадку давядзецца далучыцца Цэнтрабанку, успомніўшы рэцэпты крызіснага 2014 года.

Тады ЦБ праводзіў аперацыі валютнага REPO, крэдытуючы банкі далярамі са сваіх рэзерваў. На піку сума аперацый дасягнула 33 млрд даляраў.

ЦБ таксама актыўна падаваў банкам валютную ліквіднасць у рамках аперацый валютнага свопу. Ліміт такіх аперацый быў даволі высокім - да 10 млрд даляраў. Акрамя таго, для ўдзельнікаў рынку ўпершыню былі праведзеныя валютныя аўкцыёны Мінфіна, ліміт якіх на той момант складаў да 3 млрд даляраў.

«Цяпер аб'ём валютных сродкаў на кліенцкіх рахунках ва ўсіх сегментах скараціўся да чатырохгадовага мінімуму. Гэта азначае, што значная частка сродкаў ужо выведзена», - кажа Луцко: у базавым сцэнары санкцый - без забароны на даляравыя аперацыі для дзяржбанкаў - дэфіцыт валюты пойдзе на спад да канца года.