Праваабаронца са Светлагорску: Мы маем рацыю
4- 24.09.2018, 16:45
- 10,736
У Светлагорску ідзе барацьба людзей за права на жыццё.
Сёння ў раённым судзе Светлагорску разглядаюцца дзве адміністрацыйныя справы - актывіста Анатоля Змітровіча і праваабаронцы Алены Маслюковай, паведамляе «Радыё Рацыя».
Іх абвінавачваюць ва ўдзеле ў «несанкцыянаваным масавым мерапрыемстве», а менавіта - флэшмобе супраць кітайскага завода 15 верасня на плошчы горада. Як распавяла сябра праваабарончага цэнтру «Вясна» Алена Маслюкова:
- На маю думку, справы, якія будуць разглядацца ў судзе, даслоўна высмактаныя з пальца. Улады такім чынам спрабуюць запалохаць людзей у горадзе, каб яны не бралі ўдзел у акцыях супраціву. І такім чынам яны хочуць напалохаць грамадскіх актывістаў. Але мы перакананыя, што мы маем рацыю, наша справа накіраваная на абарону правоў чалавека.
Са слоў Алены Маслюковай, у Светлагорску ідзе барацьба людзей за права на жыццё, супраць экалагічнага генацыду.
Нагадаем, што ў горадзе запрацаваў камбінат вытворчасці беленай цэлюлозы, людзі непакояцца, што ён пагражае іх здароўю і навакольнаму асяроддзю. У наваколлі часта стаіць смурод.