Перац чылі прызналі ежай доўгажыхароў

Важкую падставу дадаць чылі ў рацыён.

Навуковы часопіс PloS ONE пустымі словамі не раскідваецца, таму даследаванне пра карысць чырвонага перцу чылі на яго старонках выглядае асабліва пераканаўча. Навукоўцы ЗША выявілі, што яго рэгулярнае ўжыванне зніжае рызыку смерці ад усіх хвароб, паведамляе likar.info.

Спецыі ўсё яшчэ застаюцца слаба вывучаным кампанентам ежы, хоць у сеціве рэгулярна мільгаюць навіны пра тое, што яны паляпшаюць метабалізм, ліквідуюць акісляльнае дзеянне свабодных радыкалаў, змагаюцца з мікробамі, запаленнем і нават ракавымі каморкамі. Здаецца, у гэтых гучных заявах ёсць частка праўды.

Навукоўцы з Вэрмонцкага ўніверсітэта прааналізавалі звесткі вялікага даследавання National Health and Nutritional Examination Survey. 16 тысяч чалавек адказалі на пытанні аб чашчыні ўжывання розных прадуктаў харчавання. Каб даведацца пра ўплыў вострага перцу чылі на здароўе і працягласць жыцця, удзельнікаў падзялілі на 2 групы: тыя, хто дадаваў перац чылі ў ежу хоць бы раз на месяц, і тыя, хто не ўжываў яго зусім.

За 6 гадоў назірання (з 1988 да 1994 года) памерла 5000 чалавек: 33,6% сярод тых, хто не ўжываў перац чылі, і 21,6% сярод яго прыхільнікаў. Навукоўцы высветлілі, што прыхільнасць да гэтага прадукту звязаная са зніжэннем рызыкі смерці ад усіх прычын на 36% (з папраўкай на лад жыцця і агульны стан здароўя - 13%, што таксама няблага).

Прычынна-выніковую сувязь паміж ужываннем перцу чылі і зніжэннем смяротнасці даследаванне не паказвае, але такая статыстычная залежнасць выклікае аптымізм. Нагадаем, што ў медыцыне востры перац ужываюць у якасці мясцовага раздражняльнага сродкі для палягчэння сімптомаў радыкуліту, неўралгіі, падагры і люмбага, а настойка з яго пладоў паляпшае апетыт і страваванне.