МАРГ знайшоў парушэнні ў 27 крамах з таннымі таварамі з Азіі
6- 22.09.2018, 14:34
- 10,767
Беларускія ІП прадаўжаюць скардзіцца на крамы, якія ва ўсёй краіне адкрываюць выхадцы з Сярэдняй Азіі.
Міністэрства антыманапольнага рэгулявання і гандлю праверыла 27 крам, якія гандлююць адзеннем з Сярэдняй Азіі, і заклікае грамадзян быць пільнымі пры куплі тавараў лёгкай прамысловасці нізкімі коштамі.
Супрацоўнікі МАРГ наведалі з праверкай крамы з танным адзеннем у васьмі беларускіх гарадах - Бабруйску, Гародні, Жодзіне, Кобрыне, Менску, Наваполацку, Полацку і Рэчыцы. Кантралёры знайшлі парушэнні заканадаўства аб гандлі ў кожным гандлёвым пункце, а ў некаторых крамах - паўторна.
Як паведамляецца на сайце МАРГ, грамадзяне павінны быць як мага больш уважлівымі пры куплі тавараў лёгкай прамысловасці нізкімі коштамі. Падчас праверкі ва ўсіх 27 крамах былі выяўленыя парушэнні заканадаўства аб гандлі: да спажыўцоў не даводзілі поўную інфармацыю пра прадаўца, тавары, яго вытворцу; адсутнічалі дакументы аб ацэнцы адпаведнасці; прадаўцы не выконвалі патрабаванні тэхрэгламентаў Мытнага саюза.
У МАРГ прыйшлі да высновы, што ў такіх крамах «у продаж дапускаецца няякасная прадукцыя, якая нясе патэнцыйную пагрозу прычыненню шкоды жыццю і здароўю грамадзян». Пасля праверкі суб'екты гаспадарання атрымалі 53 рэкамендацыі аб ліквідацыі выяўленых парушэнняў. Па фактах паўторна выяўленых парушэнняў разглядаецца пытанне аб пачатку адміністрацыйнага працэсу ў дачыненні да 13 вінаватых асоб.