У прыватных маршрутнікаў зноў праблемы

Праз новыя правілы спыняе працу буйны рэгіянальны вознік.

21 верасня буйны вознік «Полацкі экспрэс» прыпыніў рэзерваванне паездак на кастрычнік. Далейшая праца фірмы пад пытаннем, паведамляе «Еўрарадыё».

«Полацкі экспрэс» - буйны рэгіянальны вознік. Маршруткі ў сталіцу з Полацка і Наваполацка ходзяць кожную гадзіну. Кіроўцы забіраюць пасажыраў у месцах, зручных кліентам, звычайна, гэта прыпынкі грамадскага транспарту. Адна паездка каштуе 10 рублёў.

«Пакуль мы часова прыпынілі рэзерваванне месцаў, каб потым не касаваць, - каментуе сітуацыю кіраўнік «Полацкага экспрэса» Дзмітрый Навіцкі. - У нас падрыхтаваныя не ўсе дакументы, каб працаваць далей. На сёння дамова на рэгулярныя перавозкі ў нас не ўкладзеная. І ці мы зробім гэта - мы не ведаем. Выйшлі новыя правілы, якія пачынаюць працаваць з 12 кастрычніка».

Новую рэдакцыю «Правілаў аўтамабільных перавозак пасажыраў» савет міністраў прыняў 31 жніўня. Гэта дакумент на 70 старонак, які ахоплівае абсалютна ўсе нюансы камерцыйных пасажырскіх перавозак: ад нормаў допуску кіроўцаў да працы да памеру і выгляду «шашачак» на аўтамабілі таксоўкі. Згодна з ім, без дамовы аб арганізацыі рэгулярных аўтамабільных перавозак праца возніка немагчымая.

Журналісты даведаліся, што дамова на рэгулярныя перавозкі ў «Полацкага экспрэса« скончылася 13 верасня.

«Мы прапанавалі гэтай фірме ўкласці дамову з намі, - кажа дырэктар Віцебскага прадпрыемства «Аператар перавозак» Сяргей Маршаловіч. - Адказу пакуль няма. Наколькі ведаю, у «Полацкага экспрэса» была дамова з прадпрыемствам «Мінскаблпасажыртранс»».

У полацкай фірме «Новы паварот», якая таксама працуе на менскім кірунку, паведамілі, што яны працуюць як звычайна.

У чым складанасць укласці дамову на рэгулярныя перавозкі?

«Ніякай складанасці ўкласці дамову няма. Складана выконваць усе гэтыя новаўвядзенні, - распавядае Генадзь, уласнік фірмы-возніка з Салігорску. - Калі чалавек адпрацаваў 15 гадоў, то яму трэба адкрываць прыватнае ўнітарнае прадпрыемства. Потым трэба адмовіцца ад рэзервавання праз тэлефон і інтэрнэт. Таксама справа ў картках на ажыццяўленне рэгулярных пасажырскіх перавозак, якія выдае «Мінскаблпасажыртранс». Калі раней выстарчала ўсім, то цяпер іншая сітуацыя. Пасажыраў трэба забіраць толькі на канкрэтных прыпынках. Там іх пяць у горадзе дазваляецца. І шэраг іншага... Дзяржава хоча, каб мы ўліліся ў шэрую масу».

Прадпрымальнік дадае, што новыя правілы створаць нязручнасці і для пасажыраў, і для вознікаў.