«Гэта «савок» нейкі»: менскім школьнікам забараняюць фарбаваць валасы

Бацькі вучняў здзіўляюцца, як колер валасоў уплывае на навучальны працэс.

Педагогі некаторых менскіх школ забараняюць дзецям фарбаваць валасы ў яскравыя колеры, піша The Village Беларусь.

Бацькі вучняў не разумеюць, чаму яскравы колер валасоў і нават некалькіх пасмаў негатыўна ўплываюць на навучальны працэс.

- Чаму школа бярэ на сябе права забараняць тое, што дазволілі бацькі? - задае пытанне адна з чытачак Юлія.

У яе дачкі некалькі пасмаў пафарбаваныя ў чырвоны колер. Адміністрацыя школы патрабуе цягам двух тыдняў «прывесці валасы ў натуральны стан».

- Настаўніца перадала патрабаванне адміністрацыі. А дачка казала, што і завуч прыходзіла, і сацыяльны педагог, і яны ўсе нешта абураліся ўчынкамі дзяцей. Гэта «савок» нейкі! - абураецца чытачка.

Больш за тое, яна баіцца, што, калі яны не выканаюць гэта патрабаванне, іх сям'ю могуць аднесці да «сацыяльна небяспечнай». У той жа час на сайце школы бацькі вучняў не знайшлі якіх-небудзь нарматыўна-прававых актаў, у якіх забараняецца афарбоўваць валасы.

- На сайце школы ёсць раздзел «Аб дзелавым стылі адзення». Але там гаворка ідзе толькі пра вопратку. Ніякіх іншых патрабаванняў да вонкавага выгляду дзяцей не выстаўляецца, - распавяла Юлія.

Сітуацыю пракаментавала намесніца начальніка аддзела выхаваўчай і ідэалагічнай працы камітэта адукацыі Менгарвыканкама Надзея Вялікая.

- Калі мы гаворым аб дзелавым стылі, то гэта тычыцца вонкавага выгляду дзіцяці цалкам: ад пятак да галавы. Мы не кажам, што сюды ўваходзіць толькі гарнітур. Ёсць не толькі дзелавы стыль у вопратцы, але і дзелавы стыль, і культура навучэнца, які наведвае ўстанову адукацыі. Калі ў нас сёння хто захоча, пафарбуе валасы ў ружовы, аранжавы, яшчэ нейкі колер, што гэта будзе? Натуральна, у адміністрацыі школы пытанне ўзнікае, - падкрэсліла яна.

Са слоў Надзеі Вялікай, вонкавы выгляд вучня рэгламентуецца правіламі ўнутранага распарадку ўстановы адукацыі.

- Бацькі могуць звярнуцца ў адміністрацыю школы і азнаёміцца з гэтым дакументам. Калі праходзяць сустрэчы з бацькоўскай грамадскасцю, усе гэтыя пытанні агаворваюцца, пачынаючы ад вонкавага выгляду вучня. А вонкавы выгляд - гэта не толькі адзенне, - адзначыла прадстаўніца камітэта адукацыі.