Кітайскія банкі далучыліся да санкцый супраць Расеі
27- 14.09.2018, 17:14
- 50,382
Яны адмаўляюцца праводзіць аплаты праз захады ў адказ з боку ЕЗ і ЗША.
Надзеі расейскіх уладаў на дапамогу Кітая ў пераадоленні санкцый Захаду паступова разбіваюцца аб суровую рэальнасць, піша сайт finanz.ru.
Хоць дэ-юрэ Пекін не ўводзіў супраць РФ якіх-небудзь фінансавых санкцый, фактычна кітайскія банкі далучыліся да абмежаванняў, уведзеных ЗША і Еўразвязам.
Камерцыйныя крэдытныя арганізацыі КНР затрымліваюць пералічэнні на рахункі расейскіх банкаў або зусім адмаўляюцца праводзіць аплаты, заявіў у пятніцу кіраўнік прадстаўніцтва Банка Расеі ў КНР Уладзімір Данілаў падчас выступу на круглым стале «Расейска-кітайскае фінансавае супрацоўніцтва як фактар эканамічнага развіцця» ў Харбіне.
«Праблемы звязаныя з пашыранай інтэрпрэтацыяй шэрагам кітайскіх банкаў абмежавальных захадаў трэціх краін», - патлумачыў ён: пад блакаванне трапляюць транзакцыі нават не ўключаных у санкцыйныя спісы кампаній.
Пры гэтым расейскія банкі адзначаюць узмацненне жорсткасці ўмоў. Гэта «прыводзіць да затрымак пры правядзенні аплатаў кліентаў расейскіх банкаў, так і сустрэчных аплатаў на карысць кампаній Расеі», - сказаў Данілаў (цытаты па ТАСС).
Са слоў віцэ-прэзідэнта Асацыяцыі банкаў Расеі (АБР) Анатоля Казлачкова, складанасці ўзнікаюць нават на этапе адкрыцця карэспандэнцкіх рахункаў.
«Праблемы гэтыя зразумелыя, яны звязаныя з санкцыйным ціскам», - паведаміў Казлачкоў, дадаўшы, што «трэба шукаць спосабы (іх) развязання для ўзаемнага поспеху».
Гэтыя пошукі ідуць ужо больш за тры гады. На тое, што кітайскія банкі адмаўляюцца праводзіць аперацыі з расейскім банкамі і значна скарацілі ўдзел у замежнагандлёвых угодах, яшчэ ў чэрвені 2015 года скардзіўся першы намеснік старшыні групы ВТБ Юрый Салаўёў.
У калонцы, напісанай для FInance Asia, ён наракаў на «супярэчлівую пазіцыя Кітая ў дачыненні да расейскіх банкаў пасля ўвядзення санкцый ЗША і ЕЗ».
Працэс дэдалярызацыі і пералічэння ў нацыянальныя валюты ўзаемнага гандлю, абвешчаны ў якасці мэты прэзідэнтам Уладзімірам Пуціным, таксама ідзе цяжка. Даляр па-ранейшаму застаецца асноўнай валютай разлікаў, распавёў Данілаў.
Паводле звестак ЦБ, у далярах праходзіць 88% угодаў што да экспарту ў Кітай і 73,6% - што да імпарту з КНР.
Пры гэтым атрымліваць рублі за прададзеныя ў Расею тавары Кітай дэ-факта адмаўляецца: доля расейскай валюты ў разліках што да імпарту складае толькі 3,8%. Гэта менш, чым у 2013 годзе (3,9%).
Плаціць у юанях Кітай гатовы ахвотней - за мінулы год у кітайскай валюце прайшло 8% экспартных угод супраць 1,7% чатыры гады таму.
Маштабы выкарыстання нацыянальных валют у разліках «не адпавядаюць патэнцыялу расейска-кітайскіх гандлёвых дачыненняў», заявіў Данілаў. Гэтыя пытанні будуць зноў абмяркоўвацца на чарговым пасяджэнні падкамісіі ў фінансавым супрацоўніцтве 28 верасня ў Шэньчжэне (правінцыя Гуандун, Паўднёвы Кітай).