Кампанія ганаровага консула Казахстана ў Беларусі трапіла ў рэестр аб банкруцтве

Забудоўшчык «Утульнага квартала» ў Зялёным Лузе можа быць абвешчаны банкрутам.

Эканамічны суд Менскай вобласці распачаў разгляд справы аб эканамічнай неплатаздольнасці ў дачыненні да фірмы «Фрэліэйсэксім», якая належыць ганароваму консулу Казахстана ў Беларусі Чэрмену Шаканаву, піша zautra.by.

Буйная кампанія, якая ў пачатку 2000-х гадоў канкуравала са структурамі Аляксандра Машэнскага ў імпарце рыбы ў Беларусь, а цяпер займаецца інвестыцыямі ў нерухомасць, можа быць абвешчаная банкрутам.

Адпаведная інфармацыя з'явілася на партале Адзінага дзяржаўнага рэестра звестак аб банкруцтве.

З заявай на «Фрэліэйсэксім» звярнуўся яе крэдытор - кампанія «Лакі Кэрэнсі». Як сказана ў дакументах справы, сума патрабаванняў крэдытора да завінавачанага складае 2473482721,1 рубля або звыш аднаго млн даляраў.

Пастановай суда на «Фрэліэйсэксім» уведзены ахоўны перыяд (5 лістапада да 2018 года), цягам якога кампанія абавязаная падаць поўны спіс крэдытораў і дэбітораў і іншыя дакументы, неабходныя для прыняцця пастановы аб далейшым лёсе аднаго з найстарэйшых бізнэсаў Беларусі.

«Фрэліэйсэксім» была створаная ў 1994 годзе авіяцыйным інжынерам Чэрменам Шаканавым. На першым этапе яна пастаўляла рыбу і морапрадукты на рынкі Беларусі і працяглы час лідаравала ў гэтым кірунку. У канцы 2000-х гадоў бізнэсовец, які з'яўляецца ганаровым консулам Казахстана ў Беларусі, рэарганізаваў і дыверсіфікаваў бізнэс. Была створаная Група кампаній «Дэльфін», у рамках якой «Фрэліэйсэксім» пачала інвеставаць у нерухомасць. Чэрмен Шаканаў заняўся таксама рэстаранным бізнэсам («Вінаград» і «Піўняры»), гандлем металапрадукцыяй.

На сайце «Дэльфіна» пазначаныя праекты, якія ўваходзяць у партфелі групы - бізнэс-цэнтр на вуліцы Лабанка і гандлёвы цэнтр на Алібегава, а таксама новы будынак пасольства Казахстана ў Беларусі на праспекце Пераможцаў.

«Фрэліэйсэксім» таксама пачала будаваць жылы комплекс «Утульны квартал» у Зялёным Лузе, але «завязла» ў гэтым праекце. У 2015 годзе стала вядома пра праблемы забудоўшчыка - адсутнасць грошай на выкананне абавязацельстваў перад патэнцыяльнымі навасёламі. Праект адмовіўся крэдытаваць банк і партнёр па будоўлі, і ўсе абавязацельствы ляглі на плечы «Фрэліэйсэксіма», які прадаўжаў будаваць «Утульны квартал» за кошт уласных сродкаў і грошай, атрыманы ад продажу жыллёвых аблігацый.