У Міністэрстве аховы здароўя Беларусі надумалі стварыць сістэму ўнутранай бяспекі

Яна будзе займацца кантролем закупак лекаў і абсталявання.

У міністэрстве аховы здароўя Беларусі з'явіцца «сістэма ўнутранай бяспекі», якая складаецца з дасведчаных эканамістаў. Пра гэта ў эфіры тэлеканала СТВ заявіў міністр аховы здароўя Валерый Малашка, паведамляе tut.by.

- Мы павінны правесці сапраўды нейкую перазагрузку ў стаўленні, найперш, да фінансава-гаспадарчай дзейнасці, кантрольнай дзейнасці з ўстановамі аховы здароўя. Зразумела, што сёння мы павінны ўводзіць сістэму ўнутранай бяспекі. Гэта не столькі міліцэйскія функцыі, так скажам, колькі найперш дасведчаныя эканамісты, якія будуць кантраляваць і сярэднеўзважаныя кошты той тэхнікі, якая набываецца, лекавыя прэпараты, кантраляваць парадак правядзення тых ці іншых працэдур. На гэтым акцэнтаваў сваю ўвагу Лукашэнка, - распавёў кіраўнік Міністэрства аховы здароўя пра вынікі нарады аб праблемных пытаннях у сістэме аховы здароўя і кадравых прызначэннях.

На гэтай нарадзе, якая прайшла11 верасня, Лукашэнка жорстка раскрытыкаваў сітуацыю з карупцыяй у Міністэрстве аховы здароўя і міністра ўстановы.

- Гэта ж у вас пад носам. Ну вы куды глядзелі? Бо там затрыманыя непасрэдна вашы падначаленыя. Вы мне сумленна скажыце, паміж намі кажучы, вы здольныя кіраваць міністэрствам? Бо калі вы няздольныя, далей будзе горш.

У сваю чаргу Валерый Малашка запэўніў дыктатара, што «зробіць усё для таго, каб выправіць хібы».

Таксама Лукашэнка прыстрашыў кіраўніцтву Міністэрства аховы здароўя.

- Я вам задаю наўпроставае пытанне ўсім - намеснікам, міністру - вы там, выпадкова, не трапіцеся? Мая вам парада і перадайце сваім падначаленым - калі ў вас там нешта ёсць, то вы знайдзіце магчымасць выхаду з гэтай сітуацыі. Гэта мая вам парада. Не дай Бог мне паведамяць хоць пра найменшую зачэпку пра персаналіі, пра кіраўніцтва Міністэрства аховы здароўя, я буду намагаць на тым, каб памножылі на 3. Мінімум атрымаеце каэфіцыент 3. Калі дзесьці памілаванне камусьці будзе, то вам будзе павелічэнне. Адразу множце на 3. Таму калі, не дай Бог, вы дзесьці заблыталіся, пашукайце выхад з гэтай сітуацыі.

Нагадаем, 25 чэрвеня старшыня КДБ Валерый Вакульчык паведаміў аб тым, што камітэт выявіў маштабную карупцыйную схему ў сферы аховы здароўя Беларусі, затрыманыя некалькі дзясяткаў чалавек. У іх ліку - дырэктар цэнтра экспэртыз і выпрабаванняў у ахове здароўя Аляксандр Сталяроў, дырэктар прадпрыемства «Белмедтэхніка» Аляксандр Шарак, начальнік галоўнай управы аховы здароўя Гарадзенскага аблвыканкама Андрэй Стрыжак і начальнік вайскова-медыцынскай управы Міністэрства абароны Аляксей Яськоў. Пазней стала вядома пра затрыманне намесніка міністра аховы здароўя Ігара Ласіцкага, галоўнага лекара Менскай абласной лякарні Андрэя Каралько, дырэктара Рэспубліканскага навукова-практычнага цэнтра траўматалогіі і артапедыі Аляксандра Бялецкага, галоўнага лекара 9-й лякарні Валерыя Кушнерэнкі і загадчыка эндаскапічным аддзяленнем Андрэя Саўчанкі. У сярэдзіне жніўня некалькім затрыманым змянілі меру стрымання. З прадстаўнікоў буйнога прыватнага бізнэсу летам былі затрыманыя ўладальнік «Іскамеда» Сяргей Шакуцін і старшыня рады дырэктараў найбуйнейшай прыватнай аптэчнай сеткі «Аптэка груп» Леанід Томчын.